GISUBAY sa kapulisan sa dakbayan sa Talisay ang lainlaing anggulo bahin sa pagpusil-patay kang Lagtang Barangay Konsehal Art Stephen Bas niadtong Biyernes sa buntag.
Gibutyag ni Supt. Marlu Conag, hepe sa Talisay Police Station, nga dihang nahinabi nila ang pamilya sa biktima, sila giingnan sa mga miyembro niini nga hayan pulitika ang posible anggulo nagpaluyo sa kamatayon sa batan-ong konsehal sa barangay.
Nitug-an ang pamilya sa biktima kang Conag nga si Bas lang ang bugtong tawo nga nigamit sa puti nga SUV nga maoy gisakyan niini dihang gibanhigan sa armadong mga tawo.
Sukwahi kini sa pagtuo sa uban nga hayan “mistaken identity” ang nahitabo kay giingong dunay pipila ka mga tawo ang nakakita sa amahan sa biktima nga si kanhi Lagtang Barangay Kapitan Marc Ferdinand Bas nga nigamit sa puti nga SUV sa pipila ka mga okasyon.
Apan sumala ni Conag, nga gawas sa pulitika, gitan-aw usab nila ang ubang mga anggulo sa krimen sama sa gidili nga drugas.
Ang amahan ni Bas ang usa sa tulo ka mga opisyal sa barangay sa Sugbo nga giila sa Philippine Drug Enforcement Agency (PDEA) nga nalambigit sa kalihokan sa gidili nga drugas.
Samtang, gituohan sa kapulisan sa Talisay nga ang nahitabong ambush sa tulo ka mga priso sa Talisay City Jail niadtong Biyernes usab kay usa ka “liquidation” sa pipila ka mga sindikato sa gidili nga drugas sa Sugbo.
Sumala ni Conag nga duha sa tulo nga nangamatay nga sila si Yayam Gaviola ug Marvin Abelgas kay pulis giila nga high profile nga drug suspects. (SCG, JKV sa SunStar Cebu)