ANAA karon sa red alert status ang kapulisan sa Central Visayas subay sa State of the Nation Address (Sona) nga himuon ni Presidente Rodrigo Duterte karong adlawa.
Samtang gilauman nga mohimo og mga lihok protesta ang mga milintanteng pundok batok sa Sona sa presidente.
Matod ni Police Regional Office (PRO) 7 Director Debold Sinas nga andam na sila sa himuong mga rally sa militante karong adlawa.
Apan pabilin nilang iobserbar ang maximum tolerance.
Iya na usab gimanduan ang nagkadaiyang estasyon ubos niya nga mohimo og random nga checkpoints.
Wala’y makabakasyon nga pulis kon anaa sila sa red alert status.
Si Cebu Provincial Police Office (CPPO) Director Senior Supt. Manuel Abrugena nagkanayon nga nakigtambayayong na sila sa Cebu City Police Office (CCPO) aron suportaan ang usa'g-usa batok sa mga protesta karong adlawa.
Ang Bayan Central Visayas mohimo og tulo ka dagkong protesta sa tulo ka dapit sa Sugbo.
Gitawag nila kini nga United People’s Sona diin pagahimuon kini sa dakbayan sa Sugbo, Toledo, ug sa isla sa Bantayan.
Sa dakbayan sa Sugbo, sugdan kini sa Cebu Provincial Capitol diin aduna sila’y programa nga pagahimuon sa PRO 7 samtang ang main nga programa anha kini buhaton atubangan sa Metro Colon. (HBL)