NAGSUGOD na og init ang pulitika sa pagpili kon si kinsa ang sunod mangulo sa Association of Barangay Council (ABC) sa dakbayan sa Sugbo samtang nagkaduol ang eleksyon karong Hulyo 30.
Naa ra nilang duha ni Kapitan Niña Mabatid sa Brgy. Mabolo ug Franklin Ong sa Brgy. Kasambagan ang mosunod sa pwesto nga biyaan unya ni Kapitan Phillip Zafra sa Brgy. Tisa kinsa mahimong ex-officio member sa city council.
Una, gipasanginlan sa kampo sa Bando Osmeña Pundok Kauswagan (BOPK) nga giingong nitanyag og kwarta para sa mga kapitan nga nagkantidad og P300,000 ngadto sa P1,000,000 ang kampo ni Mabatid aron siya suportahan sa pagka-president sa ABC.
Ang maong pasangil gisalikway ni Mabatid sanglit wala siyay kwarta nga ikabayad sa mga kapitan sanglit iyang gihulagway nga gihagoan ug gipatud-an og singot ang iyang kwarta sukwahi sa kang Ong nga adunay daghang kwarta gumikan sa iyang mga transaksyon sa City Hall hilabi sa na paghakot sa basura diin ang iyang kompaniya nga PAMOCOR maoy nakadaog sa kapin P200 milyones nga kontrata apil na ang heavy equipment rentals karong tuiga.
“It is easy for Ong to shell out huge amount for vote buying because he has already enjoyed the multi-million peso deal with City Hall in garbage collection,” matod ni Mabatid
Gisumbalik sa kapitan sa Mabolo nga dili siya maoy namalit, inay ang iyang kaatbang sa presidency sa ABC aron siya suportahan.
“Ong already started enticing his followers to prepare their passports because they will be treated abroad once he wins in addition to the amounts he is giving every meeting he had with the barangay captain,” Dugang ni Mabatid.
Dili na usab unya siya masurprisa nga pasangilan siya ni Mayor Tomas Osmeña nga nitanyag siya og kwarta ngadto kang Ong para dili na padaganon.
Gipadayag sa kampo ni Mabatid nga gitinguha ni Osmeña nga makuha ang ABC post aron mahimo silang majority sa konseho ug sayon ra unya pagdiktar sa mayor sa konseho pagsunod sa iyang gusto ug mawala ang check and balance.
Ang eleksyon sa ABC ipahigayon karong Hulyo 30 hinungdan nga nagklaro na ang panag-atbang sa duha sa isip presidente sa ABC, si Ong nga beterano na sa pulitka sa barangay ug si Mabatid nga bag-o lang napili nga opisyal apan, nabaniog kaayo ang iyang ngalan ning ulahing personal nga kontrobersiya.
Ang presidente sa ABC, molingkod isip ex-offico member sa konseho, importante aron pagkuha sa mayoriya sa konseho sa dakbayan nga sa pagkakaron patas o tabla ang ilang gidaghanon sa Team Rama ug BOPK. (S)