Wa gihapoy paglubad ang kaanyag ni Ms. Anne Curtis nga niatubang sa mga sakup sa entertainment press sa Sugbo niadtong Dominggo.
Pero ayaw lang siya pangutan-a kon nganong hangtod karon wa pa siya momabdos kay matod pa niya, “that’s a very personal question.”
Last year pa lang gani kuno siya naminyo, ngano man gyud kunong apurado kaayo ka, Dong. Haha!
Ang 33-anyos namahayag nga dili kuno na dapat ipangutana sa mga magtiayon, “kasi who knows baka they’re really trying pero meron lang problema.”
Rated-16
Akong gipangutana si Anne kon unsa ka-aksyon ang pelikulang BuyBust, ang iyang tubag 90%.
“Siguro mga 10% lang ang drama.. Walang romance. Sinubukan nga namin pero di talaga kakayanin,” dayong katawa ni Anne.
“Rated-16 ang BuyBust kasi talagang napaka-violent nung pelikula. Parang it mirrors our present society pero neutral siya, wala siyang kinakampihan.”
Kauban nga niabot ni Anne Curtis sa Cebu ang iyang co-stars sa BuyBust, ang mixed martial arts champion Brandon Vera ug Arjo Atayde. Nakighimamat usab sila sa ilang fans sa Robinsons Galleria.
Gubat
Wa na ko mokuyog sa premiere showing kay mga 8 p.m. na kuno nasugdan ang screening ug nahuman tingali mga alas 11 na sa gabii.
Daghan ang nakadayeg ni Anne nga nihuman gyud sa premiere showing ug wa gyud mobarug hangtod nga wa mosiga ang suga.
Nihatag pa siya og speech isip pasalamat sa tanang fans nga nitan-aw ug niduyog niya niadtong gabhiona. Usa sa nalingaw sa BuyBust ang among maniniyot sa Superbalita.
“Nagtuo ko nga buybust lang sama sa akong mga coverage, gubat man gyud diay,” paambit pa ni Alan Tangcawan.
Ang Buybust gibituonan usab nilang Victor Neri, AJ Muhlach, Joross Gamboa, Noni Buencamino ug uban pa sa direksyon ni Erik Matti.
Showing na ni sa August 1.
Viva
Sa presscon sa BuyBust, akong gipangutana si Boss Boy Bosque sa Viva Films kon nganong sunodsunod karon ang ilang mga pelikula.
Naa pa lang gani ta sa July, pero naka-12 na sila ka pelikula, nga naglakip sa “Sid and Aya,” “Jacqueline Comes Home,” “BuyBust” ug naa pa silay “Miss Granny” starring Sarah Geronimo ug James Reid.
“Si Boss Vic (del Rosario) ra gyuy makatubag ana Troy... kita sulugoon ra man ta niya..” dayon namong pangatawa. Pagka-humble gyud nimo Sir!