Mongaya: Build, build, build ayaw og babagi

AYAW intawon babagi ang mga proyekto sa administrasyon ni Presidente Duterte alang sa Sugbo tungod lang sa politika ug panimalos.

Mao kini ang nisulod sa akong hunahuna dihang nag-aninaw ko sa mga kalambuan sa atong nasud karon.

Wala pa gi-deliver ni Presidente Rodrigo Duterte ang iyang ikatulong State of the Nation Address kun Sona, apan di malikayan ang pangagpas nga usa sa hisgutan sa presidente mao kining iyang build, build, build program.

Tipik man gud sa maong programa nga mahimo na untang masugdan sa pagtukod Bus Rapid Transit (BRT) nga makatabang sa pagsulbad sa kahuot sa trapiko dinhi sa Sugbo.

Apan, salamat sa dakong paninguha sa Office of Presidential Assistant for Visayas (OPAV), wala pa kini masugdan hangtod karon.

Ambot ba? Karon pa gyud ko niining administrasyon karon nga dunay presidential assistant nga dayag nga nibabag sa usa ka dakong proyekto sa presidente alang sa Syudad sa Sugbo.

Sa pagka karon, kutob lang una kita sa pag-awhag ni PA Mike Dino nga hunong na unta kita sa pagbabag niining BRT. Palihug, ayaw ipagan ang Syudad sa Sugbo ug ang administrasyon ni Presidente Duterte sa imong pamulitika ug panimalos.

Pederalismo

Laing tema nga atong gipaabot sa ikatulong Sona ni Presidente Duterte mao kining pederalismo kun ang pag-usab sa atong porma sa kagamhanan gikan sa unilateral ngadto sa federal.

Bag-o lang nahuman ang Constitutional Committee (ConCom) sa usa ka draft federal constitution nga gipaabot natong iduso ni Presidente Duterte ngadto sa Kongreso.

Ang Kongreso ug Senado man gud, nga maglingkod isip Constituent Assembly o ConAss, mao ang usa sa paagi nga mausab nato ang Batakang Balaod.

Kon maayo ra ang dagan sa maong proseso, gipaabot nga maandam na alang sa usa ka plebisito ang bag-ong federal constitution dungan sa mid-term elections karong umaabot Mayo 2019.

No-el?

Ambot lang sab gyud niining House Speaker Bebot Alvarez nga nagsigi na man hinuon og hisgot og no election ug pag-extend sa term limits sa mga opisyal aron kuno matarong gyud pagpanday ang bag-ong batakang balaod.

Ikapila na ko naghisgot nga sa panahon nilang Presidente Fidel Ramos ug Gloria Macapagal-Arroyo, ang no election ug term extension maoy nakapatay sa pag-usab sa Batakang Balaod.

Naa kitay nakaistorya nga sakop sa media sa Davao karong bag-o ug nagkauyon kami sa punto nga kining kang Alvarez maniubra kini aron dili siya mailisdan isip kongresista karong 2018.

Sigurado na man nga mapildi siya sa iyang distrito nga kontrolado sa partido ni Mayor Sara Duterte.

@anol_cebu sa Twitter

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph