SONA. Kagahapon sa hapon ang ikaduha nga State of the Nation Address (Sona) ni Presidente Rodrigo Roa Duterte. Daghan ang nangandoy nga mahatag na ni Presidente ang iyang gisaad nga kausaban niadtong panahon sa iyang pagkampanya pagka presidente sama sa barato nga palaliton, pagputol sa red tape, ug pagpupos sa korapsyon sa panggamhanan.
Daghan usab ang misugyot nga mahisgotan unta ni Presidente Duterte ang pagpangangkon sa China sa mga isla nga sakop sa Pilipinas, nga karon gibutangan na sa military hardware sa China. Apan sa akong tan-aw likayan sa Presidente ning mao nga isyu.
Ang pagpangangkon sa China sa mga isla nga West Philippines Sea dili lang problema sa atong nasud apan nahimo na nga usa ka international nga isyu tungod kay ang uban dagko nga nasud sama sa USA ug UK mireklamo usab tungod sa posible nga buhaton unya sa China nga ang tanan nga mga international nga barko nga moagi sa maong dapit pabayron unya og buhis.
Gani, si National Security Adviser Hermogenes Esperon, Jr. misulti na nga ang atong kagamhanan way igo nga gahum makiggiyera sa China aron pagbawi sa mga isla sa West Philippine Sea nga giokupahan na China. Matud pa ni Esperon nga kutob ra ta sa giingon nga diplomatic kon pakig-estorya lang nga pamaagi sa kagamhanan sa China.
Giokupahan sa China ang atong mga isla sa West Philippine sea tungod kay nakahibawo ang China nga kuwang sa pwersa ang atong nasud nga makiggubat kanila. Gisugdan og okupar sa China ang mga isla sa dihang gipalagpot ang mga US bases dinhi sa nasud sa panahon ni kanhi Pres. Cory Aquino.
Ang angayan nga tulisokon nganong nakaokupar ang China sa atong mga isla mao ang Kongreso, labina ang Senado, sa panahon ni Presidente Cory nga maoy mipasar og resolusyon nga di na ma-renew ang basis agreement sa US ug sa atong nasud. Dakong kalipay sa China sa pagkawala sa US basis sa atong nasud.
* * *
ABC. Mao ra ni eleksyon sa presidente sa Association of Barangay Council (ABC) sa Cebu City nga akong nakita nga grabe ang kontrobersiya. Si Kasambagan Kapitan Franklin Ong ug Mabolo Kapitan Prisca Niña Mabatid ang gidungog nga modagan pagka ABC president human si Tisa Kapitan Zafra midesidir nga di na modagan. Sa July 30 ang piliay.
Si Kap Mabatid, nga wa pa gani makasugod sa iyang termino ngan kapitan nasugamak na sa isyu dihang iyang gikasab-an ang staff sa Waterfront Hotel ug gisagpa ug gipatiran pa sa iyang kuyog nga lalaki.
Karon, gidungog na usab si Kap Mabatid nga mohatag siya og P1milyun sa kapitan nga mobotar kaniya. Hinuon, gipanghimakak ni ni Mabatid. Gani, iyang gilabay ang isyu ngadto sa iyang kaatbang nga si Kapitan Ong.