ANG old o karaang script kabahin anang mga pagpatay og mga kriminal mao kanang mo-ingon ang mga pulis nga misuway sa pag-eskapo. O ba kaha nangilog og armas bisan kon nakapusas nga binaklig o gi-ambush. Lisud tuhuan, apan makatuo na lang ta kay wala may laing saksi. Giunsa god tawon pag-ilog og armas nga nakapusas man? Giunsa god tawon pagdagan nga nakapusas gihapon unya binaklig pa gyud?
Kaniadto pa ni pero kon gamiton karon nga version sa atong kapulisan, daghan gihapon ang motuo kay kuwang man og simpatiya ang publiko niadtong mga tawo nga adunay kriminal records. Mas moingon ang publiko nga “mirisi.” Sama niadtong nahitabo nila ni Albuera, Leyte Mayor Rolando Espinosa, Sr. Klaro nga “salvage.” Tiaw nimo nang gisulod sa prisohan unya gipatay kay nakigpinusilay kay naay armas sulod sa selda. Pero ang mga tawo mas miingon nga “mirisi.”
Ang mga Parojinog sa Ozamiz City nga hapit nahurot. Bisan ang mga way labot nga sakop sa pamilya. Okay ra man sa katawhan kay nasayod man ang publiko sa ilang dautan nga binuhatan. Daghan man gani ang niingon nga mas maayo ra nga gipamatay sila para dili na makapadayon sa ilang dautang binuhatan labi pa sa illegal nga drugas.
Dako ang akong pagtuo nga scripted usab kadtong nahitabo nga pag-ambush-patay sa tulo ka mga piniriso gikan sa Talisay City Jail nga gipatay sa wala ma-ilhing mamumuno samtang luwan sa service van sa Bureau of Jail Management and Penology (BJMP) paingon sa korte niadtong miaging semana. Sakay sa van ang mga piniriso uban sa duha ka mga armadong escorts sa BJMP.
Apan sa pag-abot sa awa-aw nga lugar sa Barangay Maghaway, Talisay dihay mga armadong lalaki nga moabot ngadto sa 14 ka buok ang miharang sa van, gidis-armahan ang mga escorts ug dayon pusil sa tulo ka mga piniriso nga sila si Yayam Gaviola, Marwin Abelgas ug Jovencio Rabadon, nga puros nag-atubang og kasong illegal drugs ug frustrated murder.
Siyaro wala maka-return fire ang BJMP escorts. Giingnan lang ang escorts nga dili mopalag. Makapaduda no? (bobbygnalzaro@gmail.com)