HUMAN gipalagpot sa San Miguel Beermen ang Alaska Aces niadtong Dominggo sa Philippine Basketball Association (PBA) Commissioner’s Cup semi-finals series, nalantawan nga wala na’y makapugong sa Sugbuanong higante nga si JuneMar Fajardo sa paglangkat sa iyang ikapitong Best Player of the Conference award.
Sa pag-agak ni Fajardo sa Beermen sa 104-99 nga kadaugan batok sa Aces nga maoy naghuman sa ilang semis series, 3-1, napapha sab niini ang usa sa mga pambato sa Alaska nga si Vic Manuel sa BPC race.
Ning maong duwaa, ang produkto sa University of Cebu (UC) Webmasters nagpakatap og 26 puntos.
Ning maong mga kalambuan, nagkatul-id sab ang dalan ni Fajardo paingon sa ikalima niyang sunodsunod nga MVP award.
Apan giklaro sa lumad nga taga lungsod sa Pinamungajan, Cebu, wala siya maghunahuna sa individual awards ug mas nakatutok ang iyang atensyon nga matuboy pagbalik ang Beermen sa kampiyunato.
“Goal namin ‘yung championship. Kung ano ‘yung maipapanalo ko, ike-credit ko ‘yun sa mga teammates ko, at lalo na sa mga coaching staff,” matod ni Fajardo sa interbyu sa Spin.ph.
Ang unom ka BPC awards nga naangkon ni Fajardo usa na ka rekord sa PBA ug kon buot hunahunaon, ang iyang upat ka MVP awards usa na sab ka rekord gumikan kay iya kining nakuha sa sunodsunod nga katuigan.
Sila si basketball legends Ramon Fernandez ug Alvin Patrimonio nakabaton sab og tag upat ka MVP awards apan dili sunodsunod nga katuigan ang ilang pag-angkon niini. (ESL)