NAKATAAK pagbalik sa finals ang defending champions San Miguel Beermen human nila gipanghubog ang Alaska Aces, 104-99, niadtong Dominggo sa gabii aron tiklupon ang ilang semis series, 3-1, sa Philippine Basketball Association (PBA) Commissioner’s Cup sa Araneta Coliseum.
Kini maoy ika-40 ka mga higayon nga nakasulod sa finals ang San Miguel franchise, nga nakahipos na og 25 ka mga kampiyunato.
Igo lang miangkon sa No.6 nga luna ang Beermen human sa elimination round apan mibawi kini sa playoffs.
Ilang giharos ang Talk N’ Text KaTropa sa quarter-finals ug ning higayuna, ilang gipalagpot ang Aces sa semi-finals.
“Tonight, before the start of the game, I can see that they were ready to fight and to close this out,” matod ni Beermen coach Leo Austria.
“What we learned in our last game, when they beat us by 24 points, that’s an embarrassment for us.”
Sa Game 3, ang Beermen nasugamak sa dakong kapildihan, 104-125, apan imbes nga madismaya, ilahang gihimo ang maong kapildihan nga dakong hagit aron makbawi.
“The players’ pride, nakiliti eh. They stepped up tonight, and they’re so focused in this game,” dugang ni Austria.
Ang four-straight MVP awardee nga si JuneMar Fajardo maoy nangulo sa kadaugan pinaagi sa iyang 26 puntos samtang nidugang og 23 puntos ug 13 rebounds si import Renaldo Balkman.
Maayo sab nga nakaduwa alang sa Beermen mao si Alex Cabagnot, kinsa nagpakatap og 18 puntos lakip na niini ang krusyal nga three-point shot sa nahabiling 34 segundos, samtang nidugang og 17 puntos si Chris Ross.
“I’m so happy kay Alex. Yung kanyang pagiging clutch, andoon na naman,” matod ni Austria kabahin sa importanteng tres ni Cabagnot.
Gikan sa 43-44 nga biya sa halftime, ang Beermen nagpaulbo og 10-2 run aron iposte ang 53-46 nga labaw sa 3rd quarter ug gikan niini, wala nila buhii ang labaw.
Apan sulod sab sa pipila ka mga higayon nga nanghudlat ang Aces pjaagi sa three-point shots ni Simon Enciso.
Sa nahabiling lima ka mga segundos, ang Aces nakaduol na sab, 102-99.
Apan human niini, kalmadong nakapasulod si Cabagnot og duha ka freethrows aron iseguro ang kadaugan alang sa Beermen.
Sa finals, ang Beermen maghuwat na lang sa modaog sa laing semis series tali sa Brgy. Ginebra Gin Kings ug Rain or Shine Elasto Painters.
Ning pagsuwat, paingon pang magsangka ang Gin Kings ug Elasto Painters kagabii alang sa Game 4 sa ilang series diin nag-una ang Gin Kings, 2-1.
Puntos matag usa
San Migue (104)-Fajardo 26, Balkman 23, Cabagnot 18, Ross 17, Lassiter 8, Nabong 6, Santos 4, Standhardinger 2,
Alaska (99)- Simpson 24, Manuel 20, Enciso 19, Casio 15, Teng 6, Racal 4, Exciminiano 4, Magat 3, Thoss 2, Baclao 2. (ESL)