NAGTUO ang artist sa Los Angeles nga si Gustavo Zermeno nga ang bag-o niyang painting nga nagpakita kang LeBron James nga nagpadayag sa iyang respeto ngadto sa L.A. Lakers legends makasalikway sa vandals.
Nasayop si Zermeno. Ang giingong LeBron haters ming-ataki na sab ug mi-vandal sa bag-ong ginama ni Zermeno nga painting.
Ang painting, nga gibuhat sa Melrose and Fairfax sa Los Angeles, nagpakita kang James nga naghangad sa pagtan-aw sa Lakers legends nga nagtapok sa Staples Center, nga maoy homecourt sa Lakers, ug Great Western Forum.
Lakip nga makita sa painting mao ang mga retiradong sila si Kobe Bryant, Wilt Chamberlain, Magic Johnson, Kareem Abdul-Jabbar ug Shaquille O’Neal ug hasta ang mipanaw na nga broadcaster nga si Chick Hearn.
Giyab-an og puti nga pintal ang hulagway ni James sa painting.
Dihang gilimpyuhan ni Zermano ang iyang painting, ubay-ubay nga mga sumosunod sa Lakers ang ningtabang kaniya.
Nagkanayon si Zermano nga nakugang siya kon nganong nahitabo gihapon pagbalik ang pag-vandal.
Si James mihimo’g grabeng langas dihang nakadesisyon kining mobiya na sab sa Cleveland Cavaliers aron motapon sa Lakers sa offseason sa National Basketball Association (NBA).
Gipasabot ni Zermano nga ang bag-o niyang painting nagpakita sa respeto ni James dili lang sa Lakers legends kon dili sa tibuok organisasyon mismo. Nagpakita kini nga gihangop ni James ang kadako sa iyang obligasyon diin kinahanglan niyang maagak ang Lakers sa naandan niining gimbuhaton kaniadto – manghakot og kadaugan.
Sa sayong bahin ning buwana, ang painting ni Jonas Never, nga adunay kalambigitan sa pagbalhin ni James sa Lakers aduna sa’y vandal.
Ning maong painting si James nagsul-ob og Lakers jersey nga nahimutang sa bungbong sa Baby Blues BBQ restaurant sa Venice ug aduna kini mensahe nga “King of LA.”
Ang LeBron haters nigamit og spray-painting sa pag-vandal og “We Don’t Want You” ug “No King,” lakip na ang “3-6” nga tatawng nagtumbok sa rekord ni James sa NBA Finals.
Si James, kinsa nakasulod sa miaging walo ka sunodsunod nga NBA Finals, nakadaog og duha ka mga titulo ubos sa kampo sa Miami Heat ug usa sa Cavaliers. (AFP, ESL)