WA magdahum si Shaneen Grace Duterte ang ang iyang simpleng hulagway nga nitabang sa nabanggaan ug naangol nga lalake nag-viral sa social media.

Hangtod karon, nakurat gihapon ang 26 anyos nga nars nga lumad sa San Fernando, Cebu sa mga positibong reaksyon sa iyang pagtabang ngadto ni Reynald Roa kinsa nabangaan og motorsiklo sa may Maguikay flyover, dakbayan sa Mandaue niadtong Hulyo 17 sa kadlawon.

Matod niya nga ang iyang tumong mao ra ang pagtabang sa isig kaingon nga nagkinahanglan sa iyang pag-atiman.

Ang hulagway ni Duterte nga gi-upload sa Facebook page sa TV Patrol Central Visayas nakaangkon og sobra sa 21 mil ka reactions, kapin 2 mil nga comments ug halos 8 mil ka mga shares.

“I was shocked. It was unexpected because my intention was to help that person,” ni Duterte sa Superbalita Cebu.

Tungod sa maong hitabo, nakadayeg ni Duterte di lang ang mga netizens lakip na sab si Mandaue City Mayor Luigi Quisumbing ug mga city officials.

Niadtong milabayng Miyerkules, si Duterte gihatagan og ganti ni Quisumbing ug pasidungog gikan sa konseho sa dakbayan.

Gihatagan siya og P20,000 nga reward gikan sa mayor, gawas niini, usa ka floor resolution nga giduso ni Konsehal Nenita Layese ang napasar sa milabayng sesyon sa konseho nga nag-ila sa “heroic act” nga gibuhat niini.

Gani, personal siyang gihimamamat ni Quisumbing ug Bise Mayor Carlo Fortuna sa city hall ug gi-imbitar sab siya nga motambong sa sesyon sa konseho sa dakbayan sa milabayng semana.

Nasuta ning mantalaan nga kanunay gyud nga magdala og first-aid kit si Duterte.

Ang graduate sa University of Cebu (UC) nga nars nagsilbi sab nga volunteer kaniadto sa Emergency Rescue Unit Foundation (ERUF) sud sa halos tulo ka tuig.

Busa di bag-o alang kaniya ang pagtabang og mga tawo nga naa sa samang sitwasyon.

Niadtong Hulyo 17 sa kadlawon, padung na unta mouli si Duterte gikan sa iyang shift sa tambalanan paingon sa iyang kasamtangang gipuy-an sa Brgy. Ibabao- Estancia.

Sumala niya nga pagpadulong niya sa Maguikay Flyover, nakabantay siya nga trapik maong ninaog siya sa pagsusi kon unsay nahitabo.

“Nihunong ko ug nag-ask nila nana ba nakatawag og ambulansya then mao to pag dung naku approach sa patient, nitawag ko ambulance. Wala ko kahibaw unsa jud mahitabo nila. Basta akong nahibaw-an ni labang siya sa flyover,” ni Duterte.

Mapasalamaton si Duterte sa mga maayo og mga pagdayeg sa publiko sa iyang gibuhat.

“Wala ko ga-expect nga moabot ko nga ingon ani kadaghan og media. First time ni nako nga samok akong Facebook. Ang ako ra gyud tumong atong gabhiona nga makatabang ko atong patient,” ni Duterte kinsa kasamtangang nars sa Cortes Hospital.