DUHA sa tulo nga gipatay niadtong Domingo sa may Barangay Poblacion, Lapu-Lapu City gidudahang mao ra usab ang mipusil patay niadtong traffic enforcer sa miaging semana.
“Yung dalawa, technician (Jamel Marangit Babangol) at yung ama (Angni Osman Uga) are persons of interest doon sa pagkamatay ni Boter (traffic enforcer). Based on the statement of the witness na nag-jive sa nakuha sa CCTV,” tipik sa pamahayag ni PSupt. Eloveo Marquez, hepe sa Investigation and Detection Management Branch sa Lapu-Lapu City Police Office.
Dako ang pagduda sa kapulisan nga panimalos ang motibo sa pagpusil patay nila ni Angni Uga, 52 ug ang anak niini nga si Nasim Osman, 22 ingon man ni Jamel Marangit Babangol, 22 nga pulos taga-Lanao Del Sur.
Matod pa ni Marquez nga gun-for-hire ang mibira sa maong mga biktima diin nakatago pa unta sud sa computer shop si Nasim human nasamdan apan gigukod ug gitiwasan dayon pusil ni Babangol nga diha sud, samtang si Angni gibirahan sa laing gunman nga diha sa gawas nga bahin sa shop.
Imbestigador nakahipos og 10 ka mga basiyong bala sa .45 kalibre nga armas ug lima ka basiyo sa 9mm pistol ug usa ka slug diha sa crime scene nga nahimutang sa luyo nga bahin sa simbahan sa Birhen sa Regla.
Base sa nagpadayon nga imbestigasyon sa kapulisan nga gituohan nga gipahilom si Boter sa posibilidad nga usa kini sa witness niadtong pagpusil patay niadtong negosyante nga si Maodin Manali Lucman, 45, nga gipusil niadtong Hunyo 7 nga na-atol sa pag-inaugurate ni Presidente Rodrigo Duterte sa Terminal 2 sa Mactan Cebu International Airport.
Nasuta sab nga si Lucman kinsa presidente sa Muslim Vendors Association sa Lapu-Lapu maoy unang okopante sa establisemento nga computer shop na karon diin nahitabo ang pagpusil sa tulo ka tawo.
Kahinumduman nga niadtong Hulyo 17 gipusil si Boter sa duha ka mga lalake sa Barangay Poblacion sa dihang naglakaw gikan sa City Central School paingon sa public market area aron sa pagdumala unta sa trapiko niadtong higayona. (FVQ, Devorah Taneo ug Reyna Lopez – USJR Interns)