HAGBONG nga grado ang gihatag sa nagkahiusang militanteng pundok sa Sugbo sa duha ka tuig nga administrasyon ni President Rodrigo Duterte human nilingkod niadtong tuig 2016.
Ang ilang gibasihan mao ang walay pag-alibyo sa kinabuhi ug mas misamot tungod sa bag-ong matang sa buhis.
Gibanabana nga 120 lang ka mga militante nga gitawag og Unites |People's Sona ang nagmartsa kagahapon gikan sa Kapitolyo sa Sugbo padulong sa dalan Colon apan nihapit pit og kadali sa atubangan sa headquarters sa Police Regional Office (PRO) 7 aron ilang giyagyag ang kasagmuyo ug sintemento sa pamunoan ni Duterte.
Matod ni Jaime Paglinawan, chairman sa Bayan Central Visayas, nga sukad sa pag lingkod ni Duterte sa posisyon misamot ang kalisud sa katawhan ug tungod niini, gihatagan niya kini og uno nga grado nga kung sumahon hagbong kini.
“Ang among grupo naghatag sa grado ni Digong nga hagbong. Sa scale 1 to 10 among gihatagan og grado si Digong nga uno, hagbong si Digong,” matod ni Paglinawan.
Lakip sa ilang gikondinar ang padayong pinatyanay sa gubat batok illegal drugs. (AYB)