NAKADAWAT og mga hulga sa iyang kinabuhi si Mabolo Barangay Kapitan Niña Mabatid human siya nipadayag sa iyang kaandam sa pagpapili sa pagka-presidente sa Association of Barangay Council (ABC) sa dakbayan sa Sugbo.
Matod ni Mabatid nga sukad nilutaw ang iyang pangalan nga gihugonhugon nga magpapili sa labing taas nga posisyon sa mga barangay kapitan, nagsugod na og abot ang mga death threat.
Iyang gipadayag nga hangtod kagahapon, wala pa siya makahukom kon modayon ba siya ug dagan o dili sanglit iyang prayoridad ang seguridad sa pamilya hilabi na sa iyang mga anak.
Masayran karong adlawa kon modayon ba paglansar si Mabatid o dili sanglit karong adlawa ang gitagana para sa ilang pagsang-at sa certificate of candicay para sa eleksyon nga ipahigayon sa Hulyo 30.
Kon madayon si Mabatid, iyang ikaatbang si Kapitan Franklin Ong sa barangay Kasambagan kinsa suod nga Mayor Tomas Osmeña.
Si Mabatid nagkanayon nga gitanyagan siya sa Office of the President og police escorts hangtod 20 ka mga police personnel aron moay motabang para masiguro ang iyang kaluwasan.
Apan iyang giklaro nga wala pa siya mahatagi og security personnel sanglit wala pa siya makakumpleto mga requirement nga gikinahanglan.
Ang duha ka kampo naghiyahay og pasangil nga namalit og boto para sa sila suportahan sa umaabot nga ABC elections.
Si Mabatid gipasanginlan nga nitanyag og salapi ngadto sa mga barangay kapitan nga kaalyado sa BOPK apan gisalikway kini sa barangay Mabolo nga vote buying ang iyang gihimo kon dili nitanyag siya og financial assistance para matabangan ang ilang mga molupyo.
Si kagawad Ramil Ayuman, kanhi kapitan sa barangay Apas niingon nga gihatagan og laptop ang mga kapitan nga kaalyado sa BOPK aron dili maliso ang ilang mga boto.
Apan si Ong niingon nga dili makatarunganon nga mamalit sila og boto diin anaa nila ang mayoriya (50 ka kapitan) diin nagkinahanglan ang og 41 ka boto para modaog sa ABC presidency ang usa ka kandidato. (PAC)