ANG Assassins, Shotz Elite, Mikawa ug Tagum Squadrons maoy nanguna sa Felcris Centrale 3-on-3 Street Jam Season 2 nga nahuman niadtong Dominggo didto sa Alfresco Area sa Felcris Centrale.
Ang Assassins gilangkuban nila Clemente Ruiz, Joshua Cerbas, Alvin Calatayud ug Jayve Rusiana, midemolis sa Tadeco 20-8, sa finals sa open division sa torneyo nga gitugutan sa Samahang Basketbol ng Pilipinas Davao ug kauban gipresenta sa Sports Development Division-City Mayors Office (SDD-CMO).
Samtang sila Ivan San Diego, James Doblado, Mahloney Tarranza ug Lois Josol sa Shotz Elite, gibardok ang Sacal 21-10, sa kampeyonato alang sa juniors division.
Miiskor si Doblado og 7 puntos samtang Tarranza midugang og 6 puntos.
Bahin sa Mikawa, gipalukapa ang Brave Reds 19-5, sa finals sa pagpaluyo ni Arnie Villanueva nga midomina og 13 puntos.
Si John Rey Pasaol mihimo og 6 puntos samtang iyang teammates Josef Regil Lomuljo ug Kurt Vincent Magbanua mipakusog sa ilang depensa aron makuha ang jayvees division titulo.
Ang mibisita nga Tagum Squadrons, miuli sa titulo sa mini division kontra Assumption College of Davao Warriors.
Ang Squadrons miposte og 14-7 daug batok Warriors sa finals sa pagpanguna nila Randy Gimona, Lorwyne Libre, Eloridge Jay Bakuiz ug Angelo Ongcay.
Sa laing duwa, si Mark Romard Hernandez ang midaug sa Felcris four-point challenge samtang si Allan Abais ang mihari sa three-point king.
Ang kalihukan giisponsoran sa Pepsi, Gatorade, L.V. Ledesma Construction, Redbull ug Smart. (ABM)