NASAKSIKAN nato kagahapon, Hulyo 23, ang ikatulo nga State of the Nation Address (Sona) ni Pangulong Rody Duterte. Siyempre managkalahi ang opinyon sa naminaw.
Ang oposisyon nakulangan sa iyang pamahayag ilabi na sa hisgutanang ekonomiya sa nasud, seguridad, pagprotekta sa tawhanong katungod ug ang paagi sa administrasyon sa isyu sa West Philippine Sea.
Maximum tolerance ang ginabuhat sa Philippine National Police (PNP) sa nagkadaiyang protest action apan niadtong Sabado, nagkaharong na ang PNP ug raliyista atubangan sa Mendiola ug sa US Embassy sa Roxas Boulevard.
Sa akong tan-aw, nagkadaghan ang nisalmot sa protesta matag Sona nga dili maayong timailhan sa administrasyon.
Kamo nga naminaw sa Sona kagahapon seguradong adunay kaugalingong baruganan ug interpretasyon sa iyang pamahayag.
Puwede kining walay kabag-ohan o mao ra gihapon, may kabag-ohan nga makalipay ug ang ikatulo kay walay masulti.
Ang grupo sa mga magtutudlo nga gipangulohan sa Alliance of Concerned Teachers nga maoy pinakadako nga empleyado sa gobyerno nihatag og gradong 70 o lagpak nga grado kang Presidente Duterte.
Magtulo na ka tuig ang pangulo ug hangtud karon naghangyo pa gihapon sila sa dugang suholan.
Mahinumdoman nga ang pag-umento sa suweldo sa mga magtutudlo ang usa sa mga saad sa pangulo sa kampanya niadtong 2016.
Natuman na ang pag-umento sa suweldo sa mga sakop sa PNP ug Armed Forces of the Philippines.
Nabantayan nako nga iwit kanunay sa benepisyo nga mahatag sa mga anaa sa social services sama sa magtutudlo, panglawas, social workers, tigpanglimpyo ug tighakot sa basura, tigmando sa trapiko, ug uban pa.
Pila kaha ang suweldo sa mga public medical doctors, nurses, midwives, Barangay Health Workers (BHWs), Barangay Nutrition Scholars (BNS) ug traffic enforcers? Mabuhi na kaha sila nga disente sa ilang suweldo taliwala sa kataas sa presyo sa pagkaon, matrikula, pamasahe, abang sa gipuy-an, medisina, ug uban pa? Delikado ug hastang kapuya sa ilang trabaho.
Sulayan daw nato'g tindog sa dalan taliwala sa kainit sa adlaw ug aso sa tambutso nga maoy trabaho sa mga traffic enforcers? Kahibalo ba mo nga gawas sa sakit sa baga, sakit sa panit, pasaway nga drayber, daghang mga traffic enforcers nga nadisgrasya sa dalan? Naa pay naligsan ang tiil samtang nagbantay sa trapik.
Maayo na lang dinhi sa Davao kay mitaas ang horarium sa BNS ug BHWs gikan sa P1,000 ngadto sa P5,000 matag bulan. Apan bisan pa man, makasapar ba kini sa inadlaw nga panginahanglan sa ilang pamilya? Unsay espiritu sa P5,000 sa tag P500-P1,000 nga pamasahe sa habal-habal sa barangay sa kabukiran? May mga opisyal, treasurer ug trabahante pa sa mga hilit nga barangay nga matulog na lang tawon sa Rizal Park aron makasayo ug modagan ang ilang papeles sa mga opisina sa gobyerno.
Busa para kanako, dako ang grado ni PRody sa hisgutanang peace and order ilabi na sa isyu sa kriminalidad, ilegal nga druga ug kurapsiyon. Apan ubos ang akong ihatag nga grado sa isyu sa ekonomiya ilabi na sa pagpadako sa kita ug panginabuhian sa ordinaryong Pinoy.
Ubos sab ang iyang grado sa imprastraktura nga hangtud karon pulos istorya apan way resulta.