DAVAO. Hulagway sa nahabilin sa sunog kagahapon didto sa Buhangin, siyudad sa Davao. (Macky Lim)
DAVAO. Hulagway sa nahabilin sa sunog kagahapon didto sa Buhangin, siyudad sa Davao. (Macky Lim)

Pamilya patay sa sunog

USA ka subo nga kabuntagon ang misugat sa mga Dabawenyo human natigayon ang usa ka sunog, Hulyo 23, mga alas 4:20 diha sa Block 22 Lot 8 Hope St., NHA Subdivision, Barangay Buhangin, siyudad sa Davao.

Natugaw ang malinawong pagkatug sa mga molupyo sa dapit sa singgit ug pagpangayo og pakitabang ni Pamela Pascual, 17, ang bugtong survivor sa insidente.

Sa report sa Bureau of Fire and Protection (BFP) nga nagsugod ang kalayo human nadungog ang pagbusikad sa kusinang bahin sa panimalay nila Pascual.

Wa na kalingkawas pa ang amahan sa pamilya nga si Christopher, 47 anyos, empleyado sa Pagcor, inahan sa pamilyang si Rose, 40, ug ang manghud sa survivor nga si Camille, 12 anyos.

Si Pamela nga nag-inusarang survivor sa hitabo, gitabang sa mga silingan, gidala sa Southern Philippines Medical Center tungod sa mga samad ug paso sa lawas.

Sa usa ka Facebook video nga miguwa, makita si Pamela samtang naghilak, nagpakitabang nga i-rescue ang iyang pamilya.

Tungod grabeng pagkahinanok sa pamilya, gilantaw nga wala dayon sila makabantay ug maluwas ang kaugalingon.

Gideklara nga fire out ang insidente mga alas 5:00 sa buntag.

Gidala sa Scene of the Crime Operatives ang mga patay'ng lawas sa mga biktima sa Angel Funeral Homes.

Gibana-banaan sab nga anaa sa P1.2 milyon ang damyos sa hitabo.

Related Stories

No stories found.
SunStar Publishing Inc.
www.sunstar.com.ph