2 lalaki milagpot sa kanal patay

GITOUHANG tungod sa kadanlog sa dalan maoy hinungdan sa natigayong aksidente nga gikamatay sa duha ka mga lalaki ug laing tulo nga samaran human nga nibangga ang dump truck sa tricab niadtong Hulyo 22,2018 sa hapon diha sa Purok 7, Upper Puerto ning siyudad sa Cagayan de Oro.

Patay ang mga biktima nga wala pa makuha ang mga identipikasiyon.

Nagpaalim pa ang drayber sa tricab nga nailang si Rowin Alconde, 39 ug pasahero nga mag-inahan nga sila si Lilia Lagiña, 44 ug Axil Lagiña, 13 nga gipangdala diha sa Northern Mindanao Medical Center (NMMC) ning siyudad.

Sa nahipos nga impormasyon gikan sa NMMC nasayran nga nakaangkon og mga samad sa ulo lakip na usab sa nagkadaiyang parte sa kalawasan.

Gibutyag ni John Mark Bajora,30 kinsa mao’y nakasaksi sa panghitabo ug nagdala sa mga biktima sa balay tambalanan nga posibleng tungod sa kadanlog sa dalan ang hinungdan sa maong panagbangga.

“Duha ang patay, lalaki tanan, nalagpot sila sa bao-bao didto sa kanal sila nahulog kay ang bao-bao didto man nasulod sa kanal” tipik sa pahayag niini.

Ang mga nangakabsan sa kinabuhi ang gidala na sa punerarya samtang ang driver sa dumptruck gibalhog na prisohan kinsa gitakdang mag-atubang og patong-patong nga kaso.

Related Stories

No stories found.
SunStar Publishing Inc.
www.sunstar.com.ph