BISAN sa paningkamot sa gobyerno ug sa mga pribadong sektor nga makahatag og trabaho ngadto sa way mga trabaho, apan mora kuwang gihapon kini sa kadaghan sa way mga trabaho karong panahona.
Ang oportunidad nga makatrabaho mao ang dakong hinungdan kon nganong daghan sa atong kaigsuonan ang wala gasahi og og trabaho.
Duna man tuoy nakakita og trabaho apan mas daghan ang wala makatrabaho. Unya samtang dyutay ra ang nakatrabaho, matag tuig miprodyus ang Pilipinas ug daghan sab nga mga migraduwar sa nagkadaiyang mga kurso.
Gani ang uban nga nakatrabaho, di pa gyud haum ang nasudlan nilang trabaho sa kurso nga ilang nahuman. Samtang ang uban, nakatrabaho man tuod, apan di igo ang gidawatan nilang suhulan sa kompaniyang nasudlan.
Ang way trabaho nang daan, madugangan og mas daghan pa gumikan kay duna may bag-ong migraduwar sa mga kolehiyo matag tuig.
Ang unemployment maoy usa sa mga dagkong suliran nga gisagubang sa Pilipinas ning panahona. Ang pagdalit og trabaho alang sa mga way trabaho maoy problema nga angay nga tagaan og kasulbaran sa gobyerno aron nga ang Pilipino di na kinahanglang molangyaw aron nga mangita og panginabuhian.
Dinhi sa dakbayan sa Davao, naglusad ang Davao City Chamber of Commerce and Industry, Inc. (DCCCII) og jobs fair nga mahitabo karong adlawa didto sa Davao City Recreation Center, kanhi Almendras Gym.
Gihimo kini isip pasalamat sa pagsaulog nila sa ilang golden anniversary, nga giduyogan sa Department of Labor and Employment ug sa Public Employment Service Office.
Nanghinaut kita nga pinaagi niini, daghan ang makapahimulos ug makatrabaho aron nga makibhangan ang gidaghanon sa mga way trabaho dinhi sa siyudad ug sa mga kasikbit nga lugar.
Unta ang DCCCII, di lang maglusad og susama niini nga kalihukan tungod kay nagsaulog sa golden anniversary, kon dili padaghanon pa nila ang paglusad og job fairs matag tuig aron nga makatabang sa mga kaigsuonan natong way mga trabaho.