MALAUMON kaayo si Oscar De La Hoya nga sa dili madugay, madayon ra gyud ang away nila ni pound-for-pound champion Manny Pacquiao ug Floyd Mayweather Jr.

Nagtuo si De La Hoya, kinsa maoy tag-iya sa Golden Boy Promotions, nga inig human sa umaabot nga tahas sa duha ka mga boksidor, hayan mosunod na ang ilang panagharong.

Si Pacquiao, 7-time world champion, gikatakdang modepensa sa iyang World Boxing Organization (WBO) welterweight title batok kang Joshua Clottey karong Marso 13 sa Dallas Cowboys Stadium.

Click here for stories and updates on the Sinulog 2010 Festival.

Unya gipahibalo ni De La Hoya nga hapit nang ma-finalize ang negusasyon sa panagharong nila ni Mayweather ug Sugar Shane Mosley karong Mayo.

“That fight has to happen,” batbat ni De La Hoya kabahin sa Pacquiao-Mayweather kansang negusasyon napusgay gumikan sa isyu sa drug testing.

“It’s too big not to happen. We just have to cross one hurdle.”

Gipasabot ni De La Hoya nga bisa’g unsa pa’y resulta sa Pacquiao-Clottey ug Mayweather-Mosley, kinahanglan gyung madayon ang away nila ni Pacquiao ug Mayweather.

Bugtong kakulian sa Pacquiao batok Mayweather mao ang 10 ka adlaw nga gintang kabahin sa kon kanus-a ipahigayon ang drug testing. Ang kampo ni Pacquiao gusto og 24 ka mga adlaw sa dili pa ang away apan miinsister ang kampo ni Mayweather og 14.

Nanghinaot si De La Hoya nga pinaagi sa yangungo sa publiko, mausab ra ang hunahuna ni Pacquiao ug mosugot kini sa gusto ni Mayweather kabahin sa drug testing.

“The public will hopefully make him change his mind,” panghinaot ni De La Hoya. “Why would you not want to earn $40 million? Why would you not want to show the public that all this speculation is nonsense? Be the one to stand up and say it.”

Kasabot gyud si De La Hoya kon nganong estrikto gyud si Mayweather kabahin sa drug testing tungod kay duha na sab ka kontra ang iyang nasugatan nga miangkong migamit og steroids human sa ilang away.

Midaog siya batok kang Fernando Vargas niadtong 2002 unya nalupig siya ni Mosley niadtong 2003.

“I know where Mayweather is coming from with this,” batbat ni De La Hoya.

“This was a perfect stage to show the world that, hey, us fighters have nothing to hide. ... It’s not like hitting a baseball or running a sprint. These are our lives at risk up in the ring.”

Si Mayweather gituohang moinsister sab og sama nga drug testing ngadto kang Mosley ug hugot ang pagtuo ni De La Hoya nga mouyon si Mosley niini.

“I believe Mosley will raise his hand and say, ‘Take me to the laboratory,”’ dugang ni De La Hoya. “And I’ll be the first to applaud him.”