GIBUTYAG sa konsehal sa dakbayan sa Davao nga si Conrado Baluran nga 45 ka mga bus moabot sa di madugay dinhi ug makita nga managan subay sa High Priority Bus System (HPBS) program sa lokal nga kagamhanan sa tinguha nga matubag ang nagkataas nga demanda sa transportasyon.
Gikanayon ni Baluran, tsirman sa Committee on Transportation and Communication, nga atol sa AFP-PNP press corps forum Miyerkules sa Royal Mandaya Hotel nga ang programa sa lokal nga kagamhnan sa dakbayan sa Davao, nga gikonsidera isip dinalian ni Davao City Mayor Sara Duterte-Carpio nahitabo sa pakig-alayon uban sa Department of Transportation samtang ang aspetong pinansiyal ug ang loan packages alang sa implementasyon abagahon sa Asian Development Bank (ADB).
Sa inisyal, dunay 90 ka bus nga gitumong alang sa siyudad alang sa pilot testing, apan 45 ka bus moabot og una sa sunod bulan ug ang uban ipadala sa sunod nga mga bulan.
Kini nga mga bus maglakip sa libreng paggamit og Wi-Fi ug hitsas sa komportable nga espasyo lakip na ang modernong card payment methods ug misunod sa Euro 4.
Kini nga mga bus moagi sa lima ka rota. Ang unang rota gikan sa Toril padulong sa Ulas unya Matina Crossing, ug mo-counterflow sa Matina Crossing, padulong sa SM unya moagi sa Davao City Overland Transport Terminal ug matapos sa Ateneo de Davao University sa Roxas Avenue.
Ang ikaduhang giila nga rota mao ang Mintal padulong sa Roxas. Ang ikatulo nga rota mao ang Catalunan Grande. Ang ikaupat nga rota mao ang Panacan agi sa R. Castillo samtang ang ikalim mao ang Cabantian padulong sa downtown.
Iyang giklaro nga atol sa pilot testing; walay PUJs nga maapektuhan. Ang transportasyon magpabilin sa naandan gawas lang sa maong mga bus nga mobiyahe sa mga nag-unang kadalanan sa dakbayan.
Gilauman nga dunay mga pagbabag gikan sa grupo sa transportasyon, apan matud niya nga bisan tuod kon nakasabot sila sentimento apan si Baluran nagsulti nga ang kinatibuk-ang kaayohan maoy mopatigbabaw sa ilang prayoridad. Matud niya ang ang social package program ihanyag alang sa mga naapektuhan nga mga indibiduwal.
Dunay hangyo gikan sa publiko alang sa malambuon nga public transport system tungod sa problema sa trapiko nga nahimong isyu nga giatubang sa siyudad.
Kahinumdoman nga nataho kaniadto nga ang inisyal nga project implementation gilauman nga mahitabo sa 2019 apan mga opisyal nagkonsidera nga ang kahingpitan sa loan packages ug ang gikinahanglan nga rota ug ang construction bus stops ug mga bus depots, ug terminals; pag-angkon sa road-right-of-way ug retrofitting sa mga interseksiyon gikonsidera.
Nasayran nga si Duterte-Carpio mihangyo sa DOTr nga di iapil ang siyudad alang sa ilang public utility jeepney modernization plan aron nga mohatag og dalan alang sa HPBS nga padulong sab sa samang direksiyon sa pagpalambo sa public transport system. (JCR)