GIANUNSYO ni Cleveland Cavaliers general manager Koby Altman kagahapon sa Quicken Loans Arena nga mipirma na og bag-ong kontrata ang ilang bag-ong lider nga si Kevin Love.
Si Love, kinsa mao na karon ang labing pambato sa Cavaliers sa sunodsunod nga pagbiya nila ni Kyrie Irving ug LeBron James, mipirma og contract extension nga nagbalor og $120 million nga molanat og upat ka mga tuig.
“When I got traded here a few years back, I was committed to the long-term,” matod ni Love. “I was committed to the culture.”
Gitataw ni Love nga naghinamhinam na siya sa bag-o niyang tahas alang sa umaabot nga season sa National Basketball Association (NBA).
“I’m very excited. I hope that you guys are too,” dugang ni Love. “I know we’ve been to four straight Finals and been a little bit spoiled. I’m hoping that you guys will grow with us through the years.”
Ang Cavaliers nakugang dihang nakadesisyon si James nga mobiya og balik sa ilang kiliran aron motapon sa Los Angeles Lakers.
Gipaneguro sa Cavaliers nga dili mawagtang kanila si Love, kinsa nag-average og 17.6 puntos ug 9.3 rebounds sa miaging season.
Ang five-time All-Star nakatabang sa Cavaliers aron makataak sa finals sa miaging upat ka mga tuig. Reuters