GIANGKON ni Lapu-Lapu City Mayor Paz Radaza nga aduna pay siyay mga kakuwangan sa pipila ka mga proyekto nga wa pa hingpit makompleto sud sa tulo ka termino niyang pagdumala sa dakbayan.
Taliwala sa mga kalampusan ug mga nahimo ni Radaza alang sa Lapu-Lapu City, wa niya ihikling sa paghisgot atol sa iyang State of the City Address (SOCA) ang problema sa trapiko, rehabilitation sa merkado ug city hospital.
Nihangyo ang opisyal sa mga Oponganon nga patas-an ang pailob ug pagsabot sanglit gihimoan na og mga pamaagi aron makompleto ang maong mga proyekto.
“Dili man ni nato ma-magic,” na-unang pamahayag ni Radaza.
Lakip sa gihisgutan sa iyang pakigpulong atubangan sa 10,000 ka mga Oponganon ug ubang sektor sa Lapu-Lapu nga naminaw sa iyang Soca sa Hoops Dome mao ang nagpadayong rehabilitation sa karaan nga merkado publiko, pagpalapad sa city hospital ug ang dugang medical services nga itanyag sa mga pasyente.
Apil na ang mga plano ug proyekto nga ipatuman aron kahatagan og sulbad ang nagkahuot nga dagan sa trapiko sa major thoroughfares sa Lapu-Lapu City.
Usa sa mga pagsaway nga naabot sa buhatan ni Radaza mao ang problema sa karaang merkado publiko sa Barangay Poblacion diin nagpadayon ang rehabilitation sa edipisyo aron sa pagpalig-on niini ug masiguro ang kaluwasan sa mga manindahay ug mamalitay.
Matod niya nga adunay gihimong temporary arrangement ilabi na sa mga stall samtang nagpadayon ang trabaho sa building.
Gipahibawo ang publiko nga sa umaabot, adunay tukoron nga modernized public market sa Barangay Gun-ob sa atubangang bahin sa Hoops Dome.
Trapiko
Sa laing bahin, bisan sa ka moderno sa gitaod nga traffic lights sa major intersection sa siyudad, di kini sulbad sa nagkahuot nga trapiko nga maoy kanunay giyawyaw sa publiko ug motorista.
“We are looking into the possibility of establishing a monorail to totally address this problem,” tipik sa pamahayag ni Radaza.
Nidangop ang Siyudad ngadto sa Department of Transportation nga malakip ang Lapu-Lapu nga makaangkon og direct line sa gi-proposed nga Light Rail Transit.
Gitug-an sa mayor nga ang Japan International Cooperation Agency nagtinguha sa pagtukod og Mandaue Lapu-Lapu Link Bridge kun 4th Mactan Bridge nga mosumpay sa Mandaue City Coastal Road.
Kabahin sa sitwasyon sa city hospital, giangkon sa opisyal nga adunay inconvenience sa maong establisemento tungod sa nagpadayong katukoran og dugang edipisyo.
Iyang gipahibawo nga sa higayon nga mahingpit na ang tanan, way Oponganon nga magmahay tungod sa dugang serbisyo nga ilang itanyag sama sa Dialysis Center, Intensive Care Unit ug Ophthalmology department diin ang Siyudad nigahin og P16 milyones alang niini.
Milanat ngadto sa usa ka oras ug 38 minutos ang Soca ni Radaza kinsa na-emosyonal sa hinapos nga bahin sa wa pa kini manamilit.