SA tumong ug tuyo nga mapahibawo ang katawhang Pilipinhon sa iyang nahimo sa dul-an siyam ka tuig nga pagpangatungdan isip pangulong nasud sa Republika ng Pilipinas, si Presidenti Gloria Macapagal Arroyo ang tuyo nga mopagawas karon sa iyang mga advertisements sa mga pamantalaan ug sa telebisyon gamit ang pundo gikan sa nagkadaiyang buhatan sa gobiyerno.
Matud pa sa Philippine Information Agency nga walay makatumbas sa nahimong accomplishments ni Gloria Arroyo sa natad sa ekonomiya, social development, inprastraktura, power and energy, peace and order, employment generation ug uban pa. Mao nga angayang mahigmata na ang katawhan ning maong dakong kabilin nga gigasa sa mahal nga presidente sa iyang katawhan aron sa kinasingkasing siya atong kapasalamatan. Ug nga kini mamahimo lamang posible kon atong masayran ang iyang mga binuhatan. Mao nga alang ning maong katuyuan, ang kwarta na pud gihapon sa katawhan ang pareglahan.
Apan angayan natong hinumduman nga walay bisan unsang matang sa pagpasikat ug propaganda ang makatumbas ug makatabon sa kamatuoran. Unsaon man pagtuo sa kabos nga Pilipino ning ilang panghambog sa ekonomikanhong kalambuan? Kon ang tiyan sa kabos nga kinabag-an nagpabiling naghutoy ug nagkamang sa kalisdanan. Asa man dapita ang social development? Kon ang atong mamumuo wala nay saktong benepisyo ug mga sweldo tungod sa contractualization sa job market ug ang Pilipino kanunay nga biktima sa abuso, madinhi man sa sulod o gawas sa nasud.
Sa natad sa Peace and Order, bisan og maoy ilang ipaguwa ang Martial Law Declaration isip pagsulbad sa sitwasyon sa Maguindanao human sa Ampatuan Massacre kay kini nag-showcase sa political will sa presidente sa paggukod sa mga nakasala sa ngalan sa hustisya bisan pa og kini iyang mga suod nga mga higala. Apan kinsa may tinubdan ning maong kabuang sa mga Ampatuan? Dili ba kining maong mga armas, bala ug kwarta nga iya sa gobiyerno sa Pilipinas, nahitugpa sa Private Armies sa mga Ampatuan tungod sa usab sa bendisyon sa ilang giilang patrona sa pulitika? Kay sa hataas nga panahon maoy ilang kasusyo sa tinunto sa pagmaneobra sa eleksiyon sa Mindanao?
Sa natad sa inprastraktura, anaa na’s pahak sa mga Pilipino kining ilang talagsaong pagkugi hinungdan nga isip ehemplo nahuman ang bay bridge sa Cansaga, Consolacion apan dili pa mapuslan kay samtang humana ang taytayan, ang dakong tinunto kay wala pa may karsada.
Nitaas pud karun pagmaayo ang presyo sa palaliton sama sa asukar, bugas, karne, isda og uban pa unya way natilawang umento ang mga anak sa singot nga mga mamumuo. Ambot og asang dapita makapanghambog si Presidenti Gloria Macapagal Arroyo.