GUMIKAN sa report nga ang mga central processing unit (CPU) sa mga video karrera machine nga nasakmit sa Cebu Provincial  Police (CPPO) gipamaligya, ang pangulo sa Police Regional Office (PRO-7) nimandog imbestigasyon ug pahamtangag silot ang mga responsable.

Si CPPO Director Senior Supt. Erson Digal daling nimando sa iyang imbestigador nga si Insp. Ruben Cuizon nga ipasusi ang report.

Matod ni Digal nga duha ka mga buhatan ang mag-atubang og imbestigasyon.

Click here for stories and updates on the Sinulog 2010 Festival.

Una ang Provincial Intelligence Branch (PIB) pinangulohan ni Supt. Rodulfo Albotra ug ang Provincial Anti Illegal Drugs Special Operations Task Group (PAIDSOTG).

Hinuon ang hepe sa PIB nga si Albotra nihangop sa inbestigasyon.

Matod niya nga bukas siya ug ang iyang mga sakop sa bisan unsang imbestigasyon.

Nagkanayon si Albotra nga sa iyang panahon aduna silay unom ka mga video karrera nga nasakmit.

Apan kining tanan anaa ra sa iyang buhatan.

Hinuon wa na siya makahibawo nga maayo pa ba o gipangahuyan na ang mga makina.

Ang inbestigador nga si SPO4 Lamberto Hibaya niingon nga ila nang nasugdan sa pagsusi ang ubang video karrera.

Gani napulo na ka mga video karrera ang ilang gisusi ug nakompirmar nga guba ug giilisan na ang mga kandado ug aduna usay wa na gyoy CPU.

Si Digal niingon nga kon tinuod ang report, siya morekomendar ngadto ni PRO-7 Director Chief Supt. Lani-o Nerez og summary hearing.