MALAMPUSON nga napahigayon kagahapon sa Commission on Elections (Comelec) ug Smartmatic ang field test dinhi sa Sugbo sa paggamit sa Precinct Count Optical Scan (PCOS).
Kini lakip sa pag-transmit kunohay sa resulta nga mao na unyay buhaton unya sa Mayo 10 nga eleksyon.
Si Cebu Provincial Election Supervisor Lionel Marco Castillano mapasigarbuhon nga dihang natapos nila ang kalihukan sa wa pa ang paniudto kagahapon giingnan sila sa ilang ulohang buhatan sa Manila nga sila maoy unang nakahimo niini sa 10 ka mga dapit sa tibuok Pilpinas nga naghimo sa field test kagahapon.
“Kaya ra gyod namo,” matod ni Castillano pagtumbok sa pagpahigayon sa poll automation sa umaabot nga eleksyon.
Iyang gipadayag nga nasunod nila ang protocol sa paggamit sa makina ug malampuson nilang napadala ang mga resulta gikan sa presinto ngadto sa ilang server sa Manila.
Gipahigayon ang field test sa presinto sa Barangay Alpaco ug Bairan sa dakbayan sa Naga diin ang mga PCOS nga makina gibutang og duha ka mga dapit diin adunay 20 ka mga tawo nga tinud-anay usab nga ningbotar.
Una sila nibotar, niprinta una og initialization report ang makina nga nagpasabot nga wa pa gyoy nakabotar.
Dayon dihang may mga nakabotar na, moprinta gilayon silag walo ka mga kopya sa Election Returns (ER) nga ipanghatag sa mga canvasser gikan sa siyudad, probinsya ug sa kaulohan lakip na ang mga dominanteng partido, minoriyang partido, Kapisanan ng mga Brodkaster sa Pilipinas ug nganhi sa Sugbo ang C-Cimpel.
Laing 22 ka mga ER ang printa aron makompleto ang proseso.
Apan, way signal sa Bairan dihang gipahigayon ang field test kagahapon busa nigamit silag Broadband Global Area Network (BGAN) aron ipadala ang resulta pinaagi sa satellite samtang didto sa Alpaco ang signal sa Globe Telecoms maoy ilang gigamit.
Sa higayon nga anaa na sa mga canvasser ang resulta, moprinta silag canvass report, certificate of canvass, statement of votes ug certificate of canvass and proclamation.
Nalatid na sa certificate of canvass and proclamation ang resulta kon si kinsa ang mga nakadaog busa iproklamar na dayon sila sa tagsa-tagsa ka mga canvasser gikan sa lungsod ngadto sa kaulohan ang mga nakadaog gikan sa katapusang konsehal sa lungsod ngadto sa presidente.
Gawas sa gipahigayong field test kagahapon, ang Comelec mopahigayon usab og mock election sa Pebrero 6 sa Barangay Mabini ug Bulacao sa dakbayan sa Sugbo aron mahingpit na gyod ang paggamit ning mga makina alang sa poll automation.
Si Castillano namahayag nga gipili ang duha ka mga barangay nga ang usa niini naa sa rural ug ang usa naa sa urban aron ilang matandi.
Wa pa siya masayod kon ang tanang mga narehistro ning dapita mao gyoy makapahigayon sa ilang buhaton nga mock election.