HEPE sa Minglanilla Police Station nga si Insp. Leoncio Baliguat Jr. parelibuhan sa katungdanan ug gipailawom sab sa imbestigasyon ingon man ang iyang mga sakop.

Kini tungod sa napasagdan nga dagan sa trapiko nga nakaingon sa kahuot niini sa pag-agi sa convoy ni Presidente Gloria Macapagal-Arroyo padung sa lungsod sa Argao.

Si Arroyo nihatod sa lubong ni anhing Press Secretary Cerge M. Remonde niadtong Dominggo.

Click here for stories and updates on the Sinulog 2010 Festival.

Matod ni Cebu Provincial Police director, Senior Supt. Erson Digal, nga gitawagan siya ni Police Regional director Chief Supt. Lani-o Nerez niadtong Dominggo labot niini.

Nisulti si Nerez kaniya nga dugay nakalusot ang presidente sa Minglanilla tungod sa kahuot sa trapiko sanglit usa ra ka pulis ang nagbantay.

Gumikan niini, si Digal nimando sa iyang imbestigador nga si Insp. Ruben Cuizon sa pagsusi sa hitabo.

Nagkanayon si Digal nga serious neglect of duty ang nahimo ni Baliguat.

Mag-atubang kinig bug-at nga silot ilabi na kay presidente sa nasod ang niabot nga wa siyay gihimo.

Si Cuizon niingon nga sa pagkakaron ila pang gipaabot ang affidavit sa mga opisyal nga ilang kuhaan ug ingon man ang tubag ni Baliguat.

Hinuon nasayran si Baliguat nangayog pasaylo sa hitabo ug nibutyag nga aduna na siyay tawo nga gisangonan niini tungod kay wa siya makalugar gumikan sa pagpanganak sa iyang asawa.

Apan si Digal daan nang niingon nga di rason ang pagpanganak sa asawa ni Baliguat tungod kay siya man ang hepe ug aduna siyay tulobagon.

Hinungdan nga si Digal nagplanong mosuwat sa buhatan sa Commission on Elections (Comelec) nga magrekomendar sa paghulip kang Baliguat. (DRT)