GIPULIHAN si Speaker Pantaleon Alvarez ni kanhi presidente Gloria Macapagal Arroyo (GMA) sa wala pa ang State of the Nation Address (SONA) ni Presidente Rodrigo Duterte niadtong Lunes sa hapon. Gidudahan nga ang anak sa presidente si Davao City Mayor Sara Duterte Carpio, maoy milihuk aron ma-ilisdan si Alvarez nga iyang nakabangi. Misanong sa iyang panawagan ang mga kadagkuan sa PDP-Laban, Nacionalista Party (NP) ni Villar, kang Danding Cojuangco nga Nationalist People’s Coalition (NPC) ug ang National Unity Party (NUP). Ang tanang mga Marcos mibotar kang Arroyo. Sa 292 ka mga kongresista kapin sa 180 ang mipaluyo kang Arroyo. Nasayran nga 271 lamang ka mga kongresista ang mitambong sa SONA niadtong Lunes.
Ang mga katarungan sa pagtangtang kang Speaker Alvarez mao ang iya kunong pagka-diktador og batasan sama sa iyang pagtangtang kang GMA pagka-deputy speaker ug ubang mga kongresista nga wala mopaluyo sa death penalty bill ug ang iyang pagpamugos nga maghi-usa pagbutar ang mga kongresista ug mga senador ubos sa Constitutional Assembly (Con-Ass). Misamut og kalagut katawhan sa dihang iyang giinsister nga way eleksiyon (no-el) sa Mayo 2019. Mibahad pa siya nga kon dili mosuportar ang mga senador sa iyang tuyo magpatawag siya og people’s initiative aron usbon ang gimbut-an sa konstitusyon kalabut sa eleksiyon. Nasayran nga bisan ang Malacañang nabalaka niining mga tumong ug tuyo ni Alvarez.
Nalangay og kapin sa oras ang SONA tungod sa paghusay sa presidente kang GMA ug Alvarez. Midesisyon si Pres. Duterte nga hatagan si Alvarez og higayon nga maoy mo-ukopar sa rostrum uban kang Senate President Vicente Sotto III ug mao usab ang mo-welcome sa presidente pag-abut niya sa Batasan complex.
Karon nga milingkud na si GMA pagka-speaker mabungkag na ang super-majority sa ubos balay-balauranan kon kongreso. Si House Deputy Speaker Romero Quimbo (LP) wa mubotar apan mipahibawo nga ang House rules nagbuot nga ang tanan nga mi-abstain ug ang wa magpaluyo kang Arroyo maoy mahimong mga sakop sa minority. Ambut og si Alvarez ug ang iyang mga alalay nga si Majority Leader Rodolfo Fariñas, Justice Committee chairman Reynaldo Umali ug uban nilang mga alalay makig-abin ba sa LP o maghimo ba og “conscience bloc” kon independenteng pundok? Niining pagkabahin karon sa kongreso dili na sayon ang pagpasar sa charter change alang sa federalism.
Adunay tabi-tabi nga gipirmahan na ni Presidente Duterte ang suspension order ni Mayor Tomas Osmeña. Hugot kining gihimakak ni Mayor Osmeña. Sumala sa tabi nga isilbi kini sa dili pa ang eleksiyon sa Association of Barangay Councils (ABC) sa Mayo 30 aron dili na mahadlok ang mga kapitan pagpaluyo kang Barangay Mabolo Kapitan Niña Mabatid nga gipaluyuhan sa oposisyon. Kon dili tinuod nga masuspenso si Mayor Osmeña maglawig na ang kadaugan ni Barangay Kasambagan Kapitan Franklyn Ong bisan sa dakung kantidad sa salapi nga gitanyag kuno sa kaatbang.
(msr1144@yahoo.com)