SUKWAHI sa gipagawas nga monitoring price sa Department of Agriculture, mas taas ang presyo sa mga asukar nga gipamaligya sa merkado publiko sa Sugbo.

Si Edgar Gonzales ug Allen Alinabon, parehong mga tindero sa Carbon Public Market nitug-an nga tag P56 ang matag kilo sa puting asukar samtang P42 ang kilo sa brown sugar karong semanaha.

Gipaabot nga mas momahal pa kini sa mosunod nga mga semana kay ilang naobserbahan nga matag semana ang pagsaka sa presyo sa asukar sukad niadtong Disyembre diin ang white sugar naa pa sa P38 ang matag kilo samtang P28 ang brown sugar.

Click here for stories and updates on the Sinulog 2010 Festival.

Gipasabot hinuon ni DA-7 director Ricardo Oblena nga ang presyo nga ilang gipagawas ila pang na-monitor sa niaging semana sanglit matag adlaw man sila mohimo og monitoring gikan sa alas 4:30 sa kaadlawon hangtod sa alas 10:30 sa gabii.

Apan sa gihimo nilang monitoring niadtong Martes sa Pasil ug Carbon Public Market, niabot ra og P51 ang average price sa white sugar samtang P42-43 ang average price sa brown sugar.

Matod ni Oblena nga wa sila makasugat og tindahan nga nibaligya sa puting asukar sa tag P56 ang kilo.

Apan kon masutang nipahimus o nisakay ra sa kahigayonan ang maong mga tindahan, matod ni Oblena mahimo silang mapahamtangan og silot.

Sukwahi sa gipaabot sa mga sugar retailers, nagtuo hinuon si Oblena nga mominos na ang presyo sa asukar sa umaabot nga mga adlaw kay gikatakda namang moabot ang mga produkto gikan sa Negros Oriental ug Occidental nga maoy nailang mga producer og asukar.

Gawas pa niini, gikatakda na usab mopagawas og mga baratong asukar ang National Food Authority (NFA) human usab kini gimando sa gobyerno.

Matod ni Oblena nga kon mabaligya na ang NFA sugar, ma-stabilize na unya ang presyo sa asukar. (CPL)