NAHINUMDOM ko nga sa paggawas gyud sa commercial sa usa ka gatas pambata diin gipakitang gihulaman sa amahan ang iyang anak gikan sa inahan nga nipahinumdom sa nahauna nga di malimot pagpainom sa bata sa gatas, nakagusto na dayon ko niini.
Daghan ang ni-bash sa maong commercial kay kuno nag-promote sa diborsyo, pagpangabit ug uban pang rason. Nidapig ko sa commercial tungod sa paghatag og bili sa mga ginikanan sa ilang anak bisan pa kon wa sila magpuyo sa usa ka balay.
Karong bag-o nagpagawas sa ikatulong yugto sa relasyon sa maong pamilya ang maong gatas ug gipakita nga nagkauyon na ang papa ug mama. Akong pagsaludo sa nagpaluyo ning maong commercial. Di puol, may pagtulon-an nga makuha.
‘Swerte,’ ‘pinagpala,’ ug uban pa. Mao ni komentaryo sa akong mga higala ug Facebook friends sa pagkakita nila sa akong piktyur uban ni Anne Curtis, Brandon Vera ug Arjo Atayde.
Sus! Para kana ra! Haha! Bitaw, tungod sa trabaho. Dinhi ang tulo ka artista sa Cebu kay nag-premiere sa pelikulang BuyBust nga gidirihir ni Erik Matti sa Robinsons Galleria Cebu Movieworld Cinema 3 adtong Dominggo.
Grabe ang aksyon! Way putolputol. Kutas pero lingaw. Realistic sab. Niabot ang higayon nga nahutdan og bala ang mga bida nga nakadugang sa kulbahinam. Ginama kini sa Viva Films ug isalida sugod sa Agosto 1.
Matud sa promo diva nga si Josie Pereyra, sa Agosto unta ipagawas ang bag-ong pelikula sa KathNiel o Kathryn Bernardo ug Daniel Padilla pero sa unsang hinungdan, giuswag ni sa Septyembre.
Sige lang gud. Moabot ra lagi na. Ang ulohan kay The Hows of Us. Ano raw? Aw!
Motan-aw pa unta ko sa pelikulang Jacqueline Comes Home adtong weekend kay naintriga ko sa mga komentaryo. Gusto sad kong mahibalo unsa gyud ang dagan sa istorya.
Ang nakaporke kay wa ma-carry sa oras. Paet! Kini tungod kay Coco Martin na man god ang akong peg. Sa ato pa, probinsyano, ug kinahanglang mouli dayon ko sa Oslob.
Morag pirme na maguba ang hinapay ni JuneMar Fajardo kay karong gabii magsugod na ang finals sa PBA tali sa San Miguel ug Brgy Ginebra diin dunay laing ‘higanteng’ Sugbuanong basketbolista: si Greg Slaughter. Bisan malingaw pod ko aning Brgy. Ginebra, nagpabilin gihapon ang akong pagka San Miguel fan. Anà!