GIPADUSO og dugang ebidensiya ang habig sa prosecution ug depensa sa tinguhang pagpatangtang sa duha ka mga gipasanginlang nalambigit sa pagpatay ni Bien Unido, Bohol Mayor Gisela Boniel nga sila si Riolito Boniel ug Randel Lupas.
Hinungdan nga gi-uswag ni Regional Trial Court (RTC) Branch 54 Judge Ferdinand Collantes ang hearing sa maong motion ngadto na sa Agosto 9, 2018.
Si Collantes mimando sa mga abogado sa duha ka habig (reklamante ug akusado) nga mopadangat og memorandum sud sa tulo ka adlaw sukad kagahapon sa di pa mohatag ang huwes sa iyang hukom.
Samtang si Atty. Amando Virgil Ligutan, abogado sa complainant, masaligon nga mopabor kanila ang hukmanan sa pag-discharge nila ni Riolito ug Lupas isip akusado sa kaso, kini base sa balaodnon nga natala sa R.A. 6981 Section 12.
“Upon the admission of the accused into the witness protection program, it is mandatory for the judge to discharge the accuse and to delete their names in the information,” pasabot ni Ligutan.
Dugang ni Ligutan nga sa higayon nga ma-discharge ang duha ka kasong murder di na sila akusado ug magsilbi nang state witnesses.
“They will help the prosecution, prosecute the accuse in this case,” dason ni Ligutan.
Apan ang habig sa mga abogado ni kanhi Bohol Board Member Niño Rey Boniel pinaagi sa ilang lead counsel nga si Atty. Gerry Carillo mikuwestiyon sa prosecution nga kon buot lang diay ipa-discharge sila si Riolito ug Randel sa sinugdanan wa na unta gilakip pa ang pangalan niini sa information (kaso).
Kahinumduman nga nakapa-ukay sa lalawigan sa Bohol ug Sugbo ang gikatahong pagpatay ni Mayor Gisela Boniel niadtong Hunyo 7, 2017 nga giingong gipusil ug giputos sa pukot ang lawas sa wa pa ilabay kadagatan sa isla sa Olango, sakop sa dakbayan sa Lapu-Lapu.
Gitudlo ang bana sa mayor nga si Bokal Niño Rey nga maoy utok sa giingong krimen ug hangtod karon wa igkita ang lawas sa mayora. FVQ