PITO ka mga sundalo ang nasamdan sa mibusikad nga landmine nga mibusikad sa probinsiya sa Cotabato.

Ang kapulisan nag-ila sa mga biktima nga sila Corporal Geruel Hipe, Private First Class Levie Fara¤al, Pfc. Ramon Piala Jr, Pfc. Jester Pancho, Pfc. Ariel Tambangan, Pfc. Josel Miravalles ug Pfc. John Edward Tangub.

Sigun sa taho gikan sa Tactical Command Post sa 6th Infantry (Kampilan) Division sa Philippine Army, nga banda alas 6:45 sa gabii, Enero 26 nahitabo ang insidente.

Sakay ang mga sakop sa 62nd Division, Recon Company ubos sa 57th Infantry Battalion sa Philippine Army sa ilang military car gikan sa dulang basketball sa Mount Apo Alliance Bible Church, sa Bansalan Davao Del Sur ug pauli na kini sa ilang kampo.

Apan pag-abot nila sa barangay Old Bulatukan, Makilala, North Cotabato, kalit lamang mibuto ang usa ka landmine nga gibutang sa wala mailhing mga tawo kilid sa kalsada hinungdan sa pagka-angol sa pito ka mga sundalo.

Dali silang gidala sa ilang mga kauban sa Davao Del Sur Provincial Hospital ug gideklara nang luwas sa makuyaw nga kahimtang ug pulos lang naka-angkon og gagmay nga igo sa nagkadaiyang parte sa ilang lawas.

Matud ni Captain Andolong Durado, tigpamaba sa 57th IB, mga miyembro sa New People's Army ang ilang gitumbok nga nagbutang og bomba sa kalsada.

Gimandoan na ni 6th ID Chief Major General Anthony Alcantara ang iyang mga sakop sa paglutos sa mga suspek nga giingong mga sakop ni Kumander Jasmin sa Front Committee 57 sa New People's Army nga naglihok sa utlanan sa North Cotabato ug Davao Del Sur.

Dugay na nga nagbahad ang mga rebelde nga kung dili mohawa ang mga sundalo sulod sa Dole-Standfilco Banana Plantation, ila kining atakehon ug muolbo ang kagubot sa maong dapit.

Giklaro ni 57th IB Commander, Colonel Bernie Langub nga mas gipalig-on nila karon ang ilang operasyon batok sa mga NPA nga hulga sa katawhan gumikan sa grabeng pagpanghasi. (Edgardo Fuerzas)