USA ka laborer ang namatay human gidunggab sa iyang kainom sa alas 9:00 sa gabii niadtong Martes didto sa Manggahan, Toril, siyudad sa Davao.

Si SPO4 Isidro Templa, duty investigator sa Toril Police Station, nag-ila sa biktima nga mao si George Travenio, 30, ulitawo, ug nagpuyo sa Alegre Compound, Manggahan, Toril.

Matud ni Templa sa iyang spot report nga malipayon nga nakig-inom ang biktima sa mga suspetsado nga sila Jonel Lizondra, alyas Jojo, 23, ulitawo ug Renold Buyo, 29, ulitawo, laborer, nagpuyo sab sa maong lugar.

Giingon sa mga nakasaksi nga nag-inom ang ang biktima apan kalit misilaob ang panaglalis nila nga miresulta sa duguong hitabo.

Si Travenio nakaangkon og daghang mga samad dinunggaban sa iyang kalawasan mao nga gidala siya sa kapulisan didto sa Midequest Hospital sa Toril.

Mga doktor nga miatiman sa biktima nagbutyag sa kapulisan nga patay na ang biktima dihang miabot sa maong tambalanan.

Si Templa midugang sa iyang report nga human sa hitabo daling miikyas ang suspetsadong si Lizondra samtang si Buyo atua karon sa presinto sa kapulisan alang sa dugang imbestigasyon.

Ang motibo sa maong insidente, suma ni Templa, kanhi panagbikil sa biktima ug mga suspetsado mao nahitabo ang papangdunggab.

Samtang gihaya ang biktima sa Angel Funeral Homes sa Toril, gipangita karon sa kapulisan si Lizondra aron sikopon ug pasakaan og kaso ngadto sa korte.