ANG Philippine Ballroom Amateur League (Fiba-AL) miguwang kampeyon, mihakot og siyam ka bulawan, upat ka plata ug duha ka bronse nga medalya sa pagtapos sa 6th Sagadance Open Championship 2018 nga gihimo sa Ho Chi Minh City, Vietnam.
Ang pares nila Jeannette Ortiz ug Rodel Handug mihakot og unom ka bulawang medalya sa seniors 45 ch/ru/ji, seniors 45 rumba, combined-age 100 ch/ru/ji, combined-age 100 cha-cha-cha ug combined-age 100 rumba.
Wa hinuon nagmalampuson ang duha sa pagkuha sa gold medal sa seniors 45 ch/ru/ gold medal, diin nag-igo lang sila sa plata.
Atol sa Davao Sportswriters Association (DSA) Forum, Huwebes, sa Annex sa SM City Davao, ang 60-anyos nga si Ortiz nagkanayon nga kapin bulan lamang ang ilang preparasyon.
“It’s not because we are good but it’s our passion to do good,” ni Ortiz, nga bag-uhay lamang mibalik sa pagsayaw human ang 13 ka tuig nga pagpapahuway.
Dugang niya, nga dakong dungog sab sa iyang kabahin nga mahimong representante sa nasud.
Ang gipasidunggang So Kim Cheng dancesport outstanding athletes nga sila Randy Cortez ug Milagros Sasin miangkon sab og gold medal sa senior over 35 ch/ru/ji, senior over 35 ch/ru ug senior over 35 ru.
Midaug sab sila og silver sa combined age 90 ch/ru/ji ug combined age 90 ch/ru.
Samtang sila Jonas Sale ug Mila Calzada, midaug og silver medal sa combined age 90 waltz-tango ug duha ka bronse sa combined age 90 chachacha ug combined age 100 rumba.
Gigiyahan sila ni Fiba-Al president Denis Bunayog, usa ka lisensiyado nga International Adjudicator of the World Dance Council LTD. (ABM)