DAW eksena sa pelikula ang naagiang pakigbisog sa tulo sa mga pulis human sila gipang-ambush sa nagtakubang mga rebeldeng New People's Army (NPA) alas 4:10 sa hapon niadtong Huwebes sa Tagsagaong Bridge, Barangay Tomoaong, Tarragona, Davao Oriental.
Ang nasampit nga pulis mao sila Police Officer (PO) 1 George Silat, PO1 Jhonny Morales ug ang ilang chief of police sa Bangaga Municipal Police Station Chief Inspector (PCI) Marcelito Batinggana.
Sa impormasyon gikan kang Police Regional Office (PRO)-Davao Spokesperson Chief Inspector Milgrace Cajes Driz nga gikan ang tulo ka pulis nagpa-drug test sa Davao Del Norte Provincial Police Office (DDNPPO).
Sakay ang mga nahisgutan sa usa ka Toyota Avanza color gray diin sila pauli na unta sa ilang istasyon, apan ilang nakita mga kinse metros nga dunay nag-checkpoint nga mga armado.
Nagduda dayon ang tulo ka pulis nga mga NPA ang nagpahigayon og checkpoint hinungdan nga gimandoan dayon ni PCI Batinggana ang drayber nga si PO1 Silat nga mobalik sa ilang agi.
Sa ilang pagbalik, gipaulanan sila'g bala sa mga rebelde diin sa pagsukol sa mga pulis wala na nakabig ni PO1 Silat ang manubela sa sakyanan hinungdan nga nahulog sila sa pangpang.
Dihang nahulog na ang sakyanan, nasangit pa kini sa kahoy, ug naglisod na sila og abli sa pultahan hinungdan nga ilang gipamusil ang windshield sa sakyanan aron makagawas sila.
Milungtad og duha ka minutos ang pagpaulan og bala sa mga NPA ngadto sa mga pulis hinungdan nga naigo si PO1 Morales sa tiyan.
Ang tulo naningkamot sa pagtago maong nagkatibulaag sila hangtud nagpalayo ang mga NPA.
Dihang wala nay nadungog nga buto sa armas, si PCI Batinggana daling misaka sa kalsada ug nag-atang og motorsiklo aron mobalik sa DDNPPO aron makapangayo og tabang sanglit walay signal sa komunikasyon sa dapit.
Sa maong higayon, naneguro sab og luwas sa ilang kaugalingon sila PO1 Silat ug PO1 Morales kinsa nakakita sab og masakyan padung sa pinakaduol nga ospital.
Gilayong gipalibotan sa kasundalohan ug kapulisan ang dapit dihang nakataho na si PCI Batinggana sa DDNPPO samtang padayong nagpatambal sa ospital si PO1 Morales nga giubanan ni PO1 Silat.
Kagahapon sa buntag mismong si PRO-Davao director Chief Supt. Manuel Gaerlan ang midunol og financial assistance kang PO1 Morales alang sa medikasyon niini.
Nakatakda sab nga hatagan og Medalya ng Kagitingan ang nasampit nga mga pulis sa sitwasyon nga ilang naagian dihang nakasugat ang mga NPA.