Editoryal: Tungod sa social media

Editorial Cartoon by Ariel Itumay
Editorial Cartoon by Ariel Itumay

ANG pagtumaw sa social media nagdala og daghang kabag-ohan sa komunikasyon ning modernong panahon. Paspas. Dihadiha. Walay lipudlipod. Libre ug dayag sa tanan gikan sa laing bata ngadto sa labing tiguwang. Ang sakto ug sayop nga mensahe magtuyok nga wala nay babag o utlanan. Ang kalibotan nahimong gamay matag adlaw sa atong pagpakabuhi. Tinuod, nagamit kini sa mga dautang elemento apan dili usab nato masalikway ang dakong benepisyo sa katawhan.

Dinhi sa Sugbo, ang social media nauso kaayo. Apan daghang kaso sa cyber pornography ug human trafficking sukad sa internet ug pagtumaw sa social media sites nga nagpaghimulos sa inosenteng bata ug kahuyang sa mga kabus tali sa silaw sa salapi. Sa pikas bahin, daghang kaso ang nasulbad ug nabutyag luyo sa kasayoran sa awtoridad tungod sa pagbutang niini sa social media sa videos, mga hulagway o yano nga pagsuwat lang.

Nag-viral karon ang video nga nakuha sa netizens sa Barangay Tejero, Cebu City nga nahitabo niadtong Mayo apan bag-o lang na-post sa Facebook. Nakita ang pag-abuso sa menor de edad nga gituklod sa hugaw kaayo nga estero sa maong dapit human gikulata. Nasayod ang nanan-aw nga nakabuhat og sala ang bata tungod sa pagpangawat, apan mas milabaw ang kaluoy sa nahiagiman subay sa bata nga nakita video. Ang maong kaso gisubay na sa awtoridad sa kapulisan ug Commission on Human Rights (CHR).

Ang duha ka kaso sa salvaging sa dakbayan sa Mandaue City ug Liloan nailhan tungod sa pagkatap sa hulagway sa social media. Wala lang mailhi apan nakutay ang duha mga kaso nga dunay kalambigitan ug nakita ang angulo sa gidiling drugas.

Tungod sa social media, ang giasoy sa taas ug ubang kaso nasulbad. Sa kadako sa iyang tabang, responsable kita nga mogamit sa social media isip mabuot nga lungsoranon ug pabor sa kalinaw ug kaangayan sa katilingban.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph