KARON nga kapin 200 na ka subcribers ang ni-enroll sa Tisa Textline, sugdan na sa Barangay Tisa ang information caravan sa matag sitio aron mahibawo kini kabahin sa maong bag-ong matang sa teknolohiya.
Kagahapon pormal na nga gilusad ang Tisa Textline diin mao kini ang labing una nga barangay-based textline sa nasod.
Si Tisa Barangay Captain Phillip Zafra nagkanayon nga usa kining Tisa Textline nga mao ang tubag nga mas maduol ang constituent sa barangay hilabi na ang mga residente sa kabukirang sitio.
Gawas sa online enrollment sa Facebook page sa Tisa Daily Bulletin, aduna’y forms nga mamahimong mafill-upon aron makuha ang detalye ug ma-register sa Tisa Textline.
Ang textline nga nigamit sa teknolohiya sa Smart Infocast sa Smart Communications, Inc., libre kini ug nipahibawo si Nancy Nacua, ang Community Development Partnerships head sa Smart nga andam sila modugang sa ilang text allocation sa panahon nga gikinahanglan kini hilabi na sa kalamidad.
Dugang niini nga kon gusto ang ubang barangay nga mosunod sa Tisa Textline, mamahimo kining mo-request kanila.
Aduna’y 68 ka sitio ang Tisa diin tumong karon nga makuha tanang profiling sa tanang residente aron makadawat kini og anunsiyo gikan sa barangay o dakbayan , impormasyon, ug weather update gikan sa barangay.
Gawas sa text broadcast, aduna’y feedback feature ang Tisa Textline diin mamahimo nga makatext ang residente sa ilang reklamo sa dedicated nga number nga 7444(TISA) o 74448472. HBL