LUYO sa paningkamot sa gobyerno nga mahataga'g tubag ang problema sa malnutrisyon sa nasud, apan, anaa gihapon kini, nagpabiling hulga, partikular sa mga kabataan.
Sa nagkadaiyang programa sa gobyerno nga giplastar, dakong ayuda sab ang mga indibidwal nga sa ilang pamaagi mipaambit og pagtabang labot sa kampanya.
Pila ka semana na ang nakalabay, usa ka grupo sa mga kabataan ang nagkahiusa sa pagpahigayon og feeding program sa Sitio Tinago, Brgy. Felis, Malita, Davao Occidental.
Mga kabataang nag-edad og tulo ngadto 10 anyos ang nakapahimulos sa programa.
Sigun sa representante sa grupo ug head organizer Dapthny Maurine Rubia Aradillos, nga ang pag-ayuda nila sa gobyerno nga makunhuran ang malnutrisyon sa nasud, usa sa ilang adbokasiya.
Nakigduyog sab sa programa si DJoseph Avarecio Cawayan diin, sud na sa pipila ka bulan gihimo sab niya ang samang kawsa sa nagkadaiyang komunidad sa Malita.
Malaumon ang grupo nga sa ginagmay pamaagi sa ilang pagtabang, makadasig sab kini sa ubang grupo nga mohimo sa ingon.
--oOo—
Kung kamo may mga aktibidad nga buot ninyong ipamantala, email lamang kini sa rhonnie.superbalitadavao@gmail.com