NAKUGANG ang mga opisyal ug empleyado sa Cebu City Health Department human aduna’y usa ka Facebook account ang ni-post sa ilang page nga aduna’y bomba sa maong buhatan.
Apan dihang gi-verify kini sa awtoridad kagahapon sa alas 8 sa buntag, negative kini ug daling gidakop ang nag-post niini.
Ang babaye giila sa kapulisan nga si Carmelinda Caballero Dumagpi, 33, taga Barangay Ermita.
Daling nailhan ang maong babaye human sa post nga “wag kayong mag trabaho my bomba ang city health. Hahahaaha sasabog ito ika ugma sa buntag.”
Apan giingon nga gipanghimakak kini ni Dumagpi ug gitudlo ang iyahang anak nga maoy nagbuhat niini gamit ang iyang account.
Matod ni Senior Insp. Janelito Marquez, ang deputy commander sa Mabolo Police, nga dihang nakadawat sila og tawag gikan kang Dr. Alicemarie Aycrado, assistant head sa City Health, dali silang nipatawag sa operatiba sa Explosive Ordnance Disposal (EOD) aron kini ma-validate.
Mapasalamaton hinoun si Aycardo sa kapulisan sa dali nga aksyon niini sa maong bomb hoax.
Sa uwahing update sa Superbalita Cebu, gipa-medical ang maong babaye aron masuta ang kahimtang sa pangutok niini.
Mag-atubang kini og kasong kalapasan sa Presidential Decree 1727 kun ang Anti-Bomb Joke Law. HBL