GATUSAN ka mga balay ug P1 milyon ang danyos sa nahitabo nga sunog sa duha ka mga sitio sa sikit nga duha ka mga barangay sa dakbayan sa Sugbo.
Giingon nga pinasagdang kandila mao ang sinugdanan sa kayo nga daling milamoy sa kabalayan nga gama sa light materials.
Sa labing uwahi nga datus gikan ni Nagiel Bañacia, Cebu City Disaster Risk Reduction Management Office head, niabot sa 127 ka mga panimalay ang nakaon sa kayo atol sa maong sunog.
Niabot usab si 221 ka mga pamilya o 982 ka mga indibidwal ang apektado sa sunog nga natala sa Sitio Kauswagan, Basak-Pardo ug sa Sitio Sto. Niño, Kinasang-an Pardo.
Sa pakisusi sa Cebu City Fire Department, nakadawat sila sa alarma sa maong sunog alas 9:57 sa gabii niadtong Biyernes.
Niabot sa Task Force Alpha ang maong sunog alas 10:41 sa gabii.
Ug kapin usa ka oras dihang nakontrolar alas 11:47 sa gabii.
Matod sa hepe sa Cebu City, Fire Marshal Chief Inspector Noel Nelson Ababon, nga padayon nilang gisusi ang gigikanan sa kayo.
Nasayran nga nagsugod kini sa balay sa usa ka Elviza “Bebie” Flores diin giimbitar usab nila ugma, Lunes, aron mangayo og katin-awan sa hinungdan sa sunog.
Gibutyag ni Ababon nga wala’y kuryente ang maong balay ug sa pagkakaron ang kandila mao ang gitan-aw nila nga hinungdan niini.
Sa datus sa CDRRMO kagahapon sa alas 2:30 sa hapon, niabot sa 54 ka mga balay, 72 ka mga pamilya, ug 337 ka indibidwal ang apektado sa Sitio Sto. Niño, Kinasang-an Pardo.
Samtang mas daghan sa Sitio Kauswagan, Basak Pardo diin niabot sa 73 ka mga balay, 149 ka mga pamilya ug 645 ka indibidwal ang apektado.
Way namatay o nagrabehan sa maong sunog.
Anaa karon gipahimutang ang mga biktima sa Villa Zacate gym ug sa Kinasang-an Gym.
Sa lungsod sa Minglanilla, tulo ka balay ang naugdaw human gilamon sa kayo sa Barangay Lower Calajoan, alas 4 sa hapon.
Matod ni FO 1 Fulbert Navarro, nga nadawat nila ang alarma alas 4:20 sa hapon.
Pag-abot sa kabomberohan, pawong na ang kayo human nag tinabangay ang mga silingan sa pagsapyag og tubig. Apan tulo ka balay gihapon ang naugdaw. Dugang taho ni Jude Suhot