SAMA sa naandan, gisuwayan una sa Sugbuanong mga siklesta sa Sun Life Financial Bike Out ang rota sa bike event sa Mactan Newtown kagahapon, usa ka semana sa dili pa ipahigayon ang Regent Aguila Ironman 70.3 Asia-Pacific Championships.
Ang tinuig nga bike out, gisugdan niadtong 2013, nakadani og 300 ka riders nga ningsubay sa three-loop 90-kilometer bike course sa half-Ironman race, nga gikatakda karong Agusto 5 sa Shangri-La Mactan Resort & Spa sa Lapu-Lapu City.
Si Jonathan “Joy” Tumulak, kinsa maoy Cebu Province focal person on traffic management ug usa sa Ironman working committee, nagkanayon nga andam na ang rota sa bike race apan aduna pa’y kinahanglang ihan-ay inig abot sa gikatakdang petsa.
“On race proper, we’re going to look out on some portion of the route nga magkasugat ang professional athletes and age groupers. If possible we will put traffic cones to separate the roads,” pasabot ni Tumulak.
Nidugang si Tumulak nga ilaha sab susihon ang ubang dapit sama sa Maximo Patalinghug Avenue nga adunay mga establisemento sama sa malls, hospital, gasoline stations, simbahan ug uban pa.
Gipasabot ni Tumulak nga ang Lapu-Lapu traffic aduna na’y plano sa mga lugar nga sama niini.
Kabahin sa pagpakatap og impormasyon, matod ni Tumulak nga ang Lapu-Lapu City nanghatag og flyers kabahin sa mga dalan nga isirado ug sa mga alternatibong agianan atol sa lumba.
Ang Ironman 70.3 Philippines mogamit ning maong bike course sa labing unang higayon sukad niadtong 2012.
Kini gumikan kay dili na ipagamit sa kompetisyon ang South Road Properties (SRP) nga tipik unta sa rota kaniadto.
Gawas sa bike race, ang kompetisyon gilangkuban sab og 1.9-kilometer swim ug 21K run. (RSC, ESL)