INGON sa madayon na gyud ang P16.3-bilyunes nga Cebu Bus Rapid Transit project. Ang National Economic and Development Authority Investment Coordination Committee (NEDA-ICC) moaprobar na niini.
Ang BRT gilakip sa Metro Cebu Intermodal and Integrated Transport System (MCIITS) nga giproponer sa Department of Transportation (DOTr). Gawas sa BRT, dunay skytrain, Intelligent Transportation System, greenways project ug Light Rail Transit.
Ang MCIITS mao ang gitawag nga “basket of solutions” sa pagsukbad sa kahuot sa trapiko sa Metro Cebu. Sa atop pa, ang kahuot sa trapiko di masulbad sa BRT lang, busa gikinahanglan ang uban pang mga proywkto.
***
Si Socio-economic Planning Secretary Ernesto Pernia namahayag nga giaprobahan sa NEDA-ICC ang maong mga proyekto sa ilang panatagbo niadtong Biyenres. Ang Department of Transportation (DOTr) una nang nirekomendar nga kanselahon ang BRT.
Ang World Bank nigahin og P7.36 bilyunes alang sa BRT. Apan ang maong proyekto nagasingit ug nalangay tungod sa mga pangutana kon di ba kini makasamot himuon sa kahuot sa trapiko sa syudad.
Ang 27 ka kilometro nga BRT magsugod sa Bulacao hangtod sa Talamban. Ang agian sa BRT naghuot na sa mga sakyanan. Unya kuhaan pa kini ug duha ka lane nga alang lang gyud sa BRT.
***
Si Cebu City Administrator Nigel Paul Villarete niingon nga wa nay kuwestiyon sa vilability sa BRT nga giaprobahan na sa World Bank. Matod pa niya, ang BRT adunay 53.3 porsento nga economic internal rate of return.
Ang nisupak sa BRT di sab magmahay kay giapobahan man sab ang ubang mga proyekto sama sa sky train ug LRT. Sa ato pa, magpibli na lang ang mga Sugbuanon kon asa sila sakay.
Ang gusto sa BRT, adto sakay sa BRT. Ang gusto sa LRT adto sakay sa LRT. Ang gusto sa sky train, adto sakay sa sky train. Ang way ikaplete, aw mag-una man, maglakaw na lang tawon.