GIHINGUSGAN ni Bise Gobernador Agnes A. Magpale ang kampanya batok sa Online Sexual Exploitation of Children (OSEC) kon cybersex pinaagi sa paghugpong sa mga opisyales sa lungsod, kapolisan ug International Justice Mission (IJM).
Ang tigum nagsilbeng tulay alang sa lungsod, kapolisan ug IJM, usa ka non-government organization, nga maka-umol og dugang mga lakang pagbuntog sa cyber pornography.
Lima ka lungsod ang nitambong sa maong panagpulong nga naglakip sa mga lungsod sa Cordova, San Fernando ug sa mga syudad sa Mandaue, Talisay ug Bogo.
Si Magpale kinsa maoy chairperson sa Provincial Council for Women and Children, nitunol sa iyang pasalamat sa opisyales sa lima ka LGUs tungod sa ilang suporta sa malamposong operasyon batok cybersex sa ilang lugar.
Sumala sa taho, ang Central Visayas maoy ikatulo sa pinakataas nga kaso sa OSEC tibuok nasud sunod sa Central Luzon. Ang National Capital Region maoy nag-una sa listahan.
Si Regional State Prosecutor Fernando Gubalane nitug-an nga adunay 357 ka mga kaso ang niabot sa ilang opisina sukad 2003 hangtod 2017. Apan 42 lang niini ang nakombikto samtang 25 ang gibasura sa korte.
Dugang pa ni Gubalane nga usa sa nag-unang rason nga ma-dismiss ang kaso mao ang pagdumili sa biktima nga mo testigo sa korte tungod kay kasagaran sa mga akusado ilahang ginikanan or parente.
“Judges want to see victims testify live in court that is not child-friendly. So we need some judges to appreciate other forms of evidence,” matod pa ni John Tanagho, IJM field officer.
Atol sa tigum, ang Inter-Agency Council against Trafficking (IACAT) nipresentar sa ilang report diin ang ahensya naka rescue og 300 ka mga biktima gikan sa 2011 hangtod 2018 sa tibuok Centeral Visayas diin 99 gikan sa Cebu.
Sa mga naluwas nga biktima, 54 kanila adunay pangedaron na 12 anyos paubos samtang 32 ang nagedad og 12 anyos og 13 ang hamtong..
Usa sa mga hagit nga nakit-an sa grupo mao mao ang paghatag og sustainable alternative livelihood ngadto sa mga naluwas nga biktima ug ginikanan.
Apil sa mga mitambong sa maong tigum sila si Cordova Mayor Ma. Therese Sitoy-Cho, San Fernando Mayor Lakambini Reluya ug Mandaue City Vice Mayor Carlo Fortuna.