DUL-AN 14,000 ka Sugbuanon ang nakapahimulos sa 15 ka nagkalain-laing medical missions nga gipahigayon sukad niadtong Enero hangtod Mayo karong tuiga.
Ang nagkalain-laing libreng serbisyon’ng medikal naglakip sa dental, medical ug eye checkup, operation tuli, libreng bakuna ug tambal, apil na ang tupi, hilot ug pa-manicure. Aduna say feeding station nga gibutang.
Gipahigayon ang medical mission sa mga lungsod sa Oslob, Consolacion, Balamban, Daanbantayan, Minglanilla, Argao, Cordova, isla sa Camotes, ug sa mga siyudad sa Danao ug Talisay.
Si Maria Aimy Namo, 21, lumolupyo sa Barangay Poblacion, Cordova, mipadayag sa iyang kalipay nga ang Kapitolyo nagpadayon sa pagpaduol sa mga batakang serbisyo sa ilang dapit.
“Mapasalamaton ko sa Kapitolyo kay pinaagi ani nga medical mission, nakapa pre-natal check-up ko nga libre ug nahatagan mi og libreng tambal,” matod pa ni Namo, kinsa nagsabak sa iyang ikatulo nga anak.
Kauban ni Namo ang iyang duha ka anak ug tulo ka igsuon nga nakapahimulos usab sa mga libreng serbisyo.
Usa sa mga nag-unang agenda sa administrasyon ni Gobernador Hilario P. Davide III ang kahimsog sa panglawas. Ang medical mission gipangulohan ubos sa opisina ni Bise Gobernador Agnes A. Magpale, Provincial Health Office, ug uban pang pribadong organisasyon.
Padayon ang paglusad sa maong kalihokan sa uban pang kalungsoran.