NAGKAINIT na sab ang eleksiyon. Bisan layo pa kini, may mga kampo nga nangandam na sa bugnong lugaynon nga gitawag nga “best past time of Filipinos.”
Di na matago ang kaaslom sa palibot nga mora'g gipug-an og balimbing nga buot ipasabot, daghang mga politiko nga moambak sa pikas kampo. Kahibalo kita nga multi-party system ang Pilipinas busa kung unsang partido ang duol sa luwag, didto motipon ang mga politiko nga daw putyokan nga dala ang ilang dugos.
Karong bag-o lang daw, gitay-og sa Magnitude 7 nga linog ang Partido Demokratiko Pilipino (PDP)-Laban nga maoy opisyal nga partido ni Presidente Rody Duterte sa iyang paglansad niadtong 2016.
Karaan na pod nga partido ang PDP-Laban nga usa sa mga founders mao si Prof. Cesar Ledesma nga taga-Davao.
Dugay nga panahon nga gipangulohan ang partido sa mga Pimentel sa Cagayan de Oro apan bisan pa niini, wala kini naila nga kusgan nga partidong politikal hangtud nga nahimong kandidato si PRody.
Sa pagkadaug sa presidente, nahimong kusgan ang PDP-Laban kay didto nangambak ang mga sakop sa ubang partido. Naghupot sab og taas ug importanteng papel sa administrasyon ang mga opisyal sa PDP-Laban sama pananglit ni kanhi DILG Sec. Mike Suelto, nga sa wa sab madugay gitangtang sa puwesto tungod kuno sa kurapsiyon.
Karong bag-o lang, medyo niminus ang gunit sa PDP-Laban sa dagan sa politika sa nasud.
Atol sa ikatulo nga State of the Nation Address sa pangulo niadtong Hulyo 23, gitangtang si kanhi si Kongresista Bebot Alvarez isip House Speaker.
Mahinumdoman nga karong bulana usab giilisdan pagka-Senate President si Senador Koko Pimentel ni Senador Tito Sotto. Si Alvarez ug si Pimentel, mga tag-as nga haligi sa PDP-Laban.
Ang makalibog lang kay ang nagkudeta sa ilang duha mga sakop usab sa “majority coalition” sa Kongreso ug Senado. Kung buot lantawon, gigunitan sa mga alyado ni Pimentel ug PRody ang Senado.
Si Senador Sotto mismo nisuporta sa mga programa sa administrasyon samtang si Kongresista Gloria Macapagal Arroyo nga bag-ong House Speaker suod usab ni PRody.
Gani si Arroyo nianib usab sa PDP-Laban human nidaug si PRody sa 2016 election.
Ang hingpit nga kontra ni Alvarez sa probinsiya sa Davao del Norte mao si Kongresista Tony Boy Floriendo nga opisyal sab sa PDP-Laban ug usa sa mga “financiers” ni PRody.
Karon lang bag-o, adunay grupo sulod sa partido nga nagpatawag og National Assembly didto sa kaulohan diin gipulihan sila Alvarez ug Pimentel nga ilang gipalagan kay peke nga asembliya.
Kabungkagon na ba ang PDP-Laban? Sa akong tan-aw, dugay nang kabungkagon ang PDP-Laban ug ang nakapahugpong lang niini mao ang pagdagan ug pagdaug ni PRody pagka-presidente.
Bisan ang PDP-Laban sa rehiyon ug dinhi mismo sa Davao City dili magkasinabot kung kinsa ang mga tinuod nga opisyal. May grupo nga tinuod kuno kay may ID gikan ni Senador Pimentel.
May grupo sab sa PDP-Laban nga gustong ibalik ang sosyalistang oryentasyon niini ug nisaway sa pag-anib sa PDP-Laban sa mga burgis ug traditional politicians.
Karon nga nagkakusog na ang Hugpong Ng Pagbabago ni Mayor Sara, may padulngan pa kaha ang PDP-Laban?