Super Bilib: Misyon ang pagtabang sa uban

Giatake. Sila si Lesly Comiso-Magalso ug iyang inahan nga si Marcosa, kinsa naigo sa aneurysm. Matod ni Lesly, giabagan sila sa Ginuo kay natabangan sila sa operasyon niini bisan sa kadako sa galastuhan. (Tampo nga hulagway)
Giatake. Sila si Lesly Comiso-Magalso ug iyang inahan nga si Marcosa, kinsa naigo sa aneurysm. Matod ni Lesly, giabagan sila sa Ginuo kay natabangan sila sa operasyon niini bisan sa kadako sa galastuhan. (Tampo nga hulagway)

MATAG tawo, adunay misyon sa kinabuhi.

KAY dinhi sa kalibotan, dili lang ang kalamboan sa imong kinabuhi ang mahinungdanon kondili ang pagpaambit usab niini ngadto sa kadaghanan labi na sa mga nanginahanglan.

Nagtungha pa lang sa elementarya si Lesly Comiso-Magalso, 35, aktibo na siya sa mga kalihokan ug mga programa sa Girl Scouts of the Philippines (GSP) sa ilang tunghaan.

Dinhi, naabli ang iyang hunahuna nga dili lang kutob sa pagtan-aw sa kaayohan alang sa kaugalingon ang ipatigbabaw, kondili motabang usab sa isig ka ingon.

“It’s not enough nga moasenso ka sa kinabuhi, naa kay obligasyon pagtabang sa community,” paambit ni Lesly sa Superbalita Cebu.

Atol sa iyang field practice o internship sa social work sa Kapwa Ko, Mahal Ko niadtong 2002, nakita niya ang dakong panginahanglan sa pag-ayuda sa uban labi na katong nahikawan sa batang serbisyo sa panglawas.

Human sa internship ug nigradwar sa kursong Bachelor of Science in Social Work sa St. Theresa’s College sa dakbayan sa Sugbo niadtong 2003, nipadayon ni Lesly isip usa ka volunteer sa KKMK diin nakaabot siya sa siyudad sa Tanjay, Negros Oriental.

Sa maong lugar, nakakita siya og mga pamilya nga nagpuyo sa dapit nga klaro ang presensiya sa kawad-on atol sa ilang mga medical mission.

Apan nakasaksi usab siya sa buhi nga pagtinabangay sa mga Filipino sa kaubang mga Filipino nga maoy gitudlo kanila dihang siya sakop pa sa GSP.

Sa Tanjay, nakaplagan ni Lesly ang giisip niyang mission gift, ang iyang bana nga si Felipe Magalso Jr., 35, usa ka seaman ug nakasal sila niadtong 2009.

Niadtong 2008, nasakop usab sa National Nutrition Council (NNC) si Lesly pinaagi ni Dr. Parolita Mission, regional nutrition program coordinator sa NNC, nga kauban usab niya sa KKMK.

Aktibo siya nisalmot sa mga programa nga naglantaw sa maayong panglawas ug nutrisyon sa mga tawo ug siya ang nagdumala sa programa sa NNC sa sibyaanang dySS matag alas 11 sa buntag hangtod alas 12 sa udto matag Dominggo ug sa tulumanon usab sa KKMK sa samang sibyaanan, alas 10 sa buntag hangtod alas 11 sa buntag, kauban si Mission.

Aktibo usab siya sa kawsa nga naglantaw sa kaayohan ug nagtabang sa mga seaman ug ilang pamilya ubos sa Apostleship of the Sea-Cebu sugod niadtong 2014 ug mao usab ang nagdumala sa tulumanon niining Stella Mari, Bituon sa Dagat sa sibyaanang dyRF, alas 4 sa hapon hangtod alas 5 sa hapon, matag Sabado.

Sa iyang pagtabang sa uban, gisuwayan ang ilang pamilya dihang ang iyang inahan nga si Marcosa Comiso, giatake niadtong Disyembre 2015 ug nasakit og aneurysm diin nanginahanglan kini og dakong kantidad alang sa operasyon ug mga tambal.

Matod ni Lesly, wala sila pasagdi sa Ginuo, kay gitabangan usab sila sa ubang mga tawo sama ni Dr. Reynaldo Villamor nga iyang gihulagway nga murag si Hesus nga gipadala sa ilaha panahon sa kalisod.

Dako og natabang ang doktor sa operasyon sa iyang inahan. Apan niadtong Pebrero 24, 2018, namatay si Marcosa sa panuigon nga 69.

Bisan sa mga hagit sa kinabuhi, magpadayon ang mga adbokasiya ni Lesly sa natad sa nutrisyon ug maayong panglawas, kaayohan sa mga seaman ug social works nga iyang gihulagway nga maoy iyang mga misyon sa kinabuhi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph