DAKO kaayo ang pasalamat ni Ilocos Norte Governor Imee Marcos sa daghan kaayo nga mga tawo nga mihangop og miabi-abi kaniya kaniadtong miaging Sabado didto sa Tagbilaran City.
Mihugop ang mga sakop sa Marcos Loyalist Movement ni Imee Marcos og ilang gipakita ang ilang espeso nga pagbati sa pagsuporta kaniya.
Tungod niini, angay magpasalamat og dako si Imee Marcos ni CabSec Jun Evasco nga maoy “hilom” nga nagpasiugda sa pagbisita ni Imee.
Wala masayang ang 3 ka oras kapin nga pagbisita ni Imee Marcos sa Bohol tungod sa suporta ni Evasco kaniya.
Dako sab ang kalipay ni Imee Marcos sa dihang iyang nahibaw-an nga gi-endorso siya ni Davao City Mayor Inday Sara Duterte-Carpio.
***
Unsa kaha ang hinungdan nga gipusil-patay man si Medard Bompat kaniadtong Dominggo sa udto sa wala pa mailhi nga “rider-in-tandem.”
Si Bompat usa ka Jail Guard nga na-assign sa Carmen BJMP.
Matod pa sa kapolisan, gipusil si Bompat sa duha ka armadong mga tawo samtang kauban ni Bompat ang iyang asawa og nag-atiman sa ilang mga labada sa gawas sa ilang balay sa barangay Taloto.
Matod pa, ang duha ka pasahero sa duha ka motorsiklo nga pulos nag-sul-ob og helmet nanaog og gipusil si Bompat.
Wala na makaabot nga buhi pa si Bompat sa ospital.
Matod pa sa kapolisan, naapil si Bompat sa lista sa mga drug personality sa probinsiya.
Buot ipasabot, gidudahan siya nga apil sa mga nagpayuhot sa druga bisan pa sa ilang posisyon sa gobierno.
Tungod niini, deretso na dayon misulti ang kapolisan nga ang pagpusil-patay ni Bompat kay drug-related.
Imbestigahon pa kaha sa kapolisan ang maong panghitabo kon nagtuo sila nga “drug-related” kini?
***
Mao kini ang problema sa mag-sul-ob og helmet.
Dili na mailhan ang nag-sul-ob niini og sayon na lang kaayo ang paghimo sa krimen bisan pa kon adlaw nga dako.
Kon dili tangtangon ang helmet, walay tsansa nga mailhan ang nagsul-ob niini.
Tungod niini, sama sa nag-atubang sa “blank wall” ang mga imbestigador sa kapolisan nga mihimo og “hot pursuit” operation.
Kinsa may ilang gukdon?
Ang nagsul-ob og itom nga sweatshirt og maong pants?
Pila ka tawo kaha ang ilang masugatan nga nagsul-ob sa susamang mga gamit.
Ug susama nga nagsul-ob og helmet.
***
Daghan ang supak sa gihimo sa kagamhanan sa Tagbilaran nga gidili ang pag-gamit og motorsiklo nga dili magsul-ob og helmet.
Dakpon og pabayron og Fine ang magsakay sa motorsiklo nga dili mag-sul-ob og helmet, Fine para sa drayber og sa pasahero.
Mao kini hinungdan nga bisan mopalit lang og pan, kinahanglan nga mag-sul-ob gyod og helmet.
Husto kini kay kon dunay disgrasya, dako ang tsansa nga malikayan ang dakong kadaot sa ulo tungod sa helmet.
Apan dakong problema kini sanglit dili na man mailhan ang nag-sul-ob sa helmet.
Ang krimen nga nahitabo kaniadtong miaging Dominggo maoy usa ka buhing ehemplo sa dili maayo nga epekto sa pag-gamit og helmet.
***
Napulihan ni kanhi president Gloria Macapagal-Arroyo si Pantaleon Alvarez sa pagka-Speaker sa House of Representatives.
Napulihan sab ni Camarines Sur Congressman Rolando Andaya si Cong. Rody Fariñas sa pagka-Majority Floor Leader.
Walay gubot ang pag-puli ni Andaya.
Apan dakong gubot ang posisyon sa Minority Floor Leader nga kasamtangan gigunitan ni Cong. Danilo Suarez.
Gusto si Fariñas sa maong posisyon. Gusto si Cong. Miro Quimbo sa maong posisyon. Gusto sab si Cong. Danilo Suarez sa maong posisyon.
Kinsa kaha ang pillion ni PGMA?
***
Nindot kaayo ang plano ni Ombudsman Samuel Martires.
Gusto niyang imbestigahon ang gitawag og “parking fee” sa mga kaso nga gisang-at sa Office of the Ombudsman.
Unsa man kining “parking fee?”
Ang parking fee maoy bayad ngadto sa mga imbestigador sa Office of the Ombudsman aron langan-langanon ang pag-resolba sa mga kaso. Tungod sa kalangan sa pag-resolba sa usa ka kaso, mogawas na dayon ang depensa nga “inordinate delay” og mo-resulta sa pag-dismiss sa kaso.
Ang “parking fee” maoy usa ka paagi nga malikayan ang pagsang-at sa kaso ngadto sa Sandiganbayan.
Buot ipasabot, dunay kalabotan ang kurakot og ang imbestigador sa Office of the Ombudsman.
Nindot nga buhaton kini ni Martires aron mahunong na kining pagpakatulog sa mga kaso batok pangurakot;
***
Nagsugod ang estorya bahin sa “parking fee” kay giyagyag kini ni Atty. Edna Batacan sa dihang gi-interview siya sa Judicial and Bar Council kalabot sa iyang application nga mamahimong Ombudsman, puli ni Conchita Carpio-Morales.
Matod pa ni Batacan, siya mismo nahimong biktima sa maong pamaagi, bisan kon wala na niya i-klaro kon unsa gyod kini.
Tungod niini, gusto ni Martires nga idetalye ni Batacan og kinsa sa iyang mga sakop ang nangayo og kwarta kang Batacan.
Manghinaot kita nga dunay maayong resulta niining maong imbestigasyon. Ngano kaha nga wala man kini mahibaw-I ni Conchita Carpio-Morales?