KINING katarungan ba nga politically motivated kon dunay kaso isang-at batok sa politiko, klaro nga gipahimudsan pag-ayo aron makalingkawas sa ilang kalapasan ang gikasohan.
Ning bag-o gikonbikto sa Sandiganbayan si kanhi Konsehal President Elipe ug ang iyang iguson nga si Pristine Elipe Quizon sa kasong falsification of public document.
Gipasikad ang kaso sa sumbong ni Dionnie Gersana ang city administrator sa siyudad.
Basi sa sumbong ni Gersana midawat og suhol si Quizon nga P1,800 bisan wa kini magtrabaho tungod kay tua siya gawas sa nasod.
Gipirmahan ni Konsehal Elipe ang daily time record sa iyang igsuon. Nahitabo kini niadtong 2013.
Karon, miangal si Elipe nga nagkanayon “panimalos kini sa kalihokan nga politikanhon.”
Unsa may buot ipasabot ni Elipe nga ibaliwala sa Sandiganbayan ang kaso kay gisang-at kini nga malisyoso tungod kay dunay politikanhon nga motibo?
Dihang giduso ang kaso, hilom kaayo si Elipe tingali tungod kay konbensido siya nga dili mosalir ang sumbong, labi na nga gamay ra kaayo ang kantidad nga nalambigit niini.
Iapila ni Elipe ang kaso sa Korte Suprema.
Pero, kining pagkakonbikto niya si Sandiganbayan tataw na nga nakalapas gyud ang konsehal sa Republic Act 3019 o ang Anti-Graft and Corrupt Practices Act.
Matod ni Gersana mamahimo kining leksiyon sa ubang mga opisyal sa gobiyerno, labi na kadtong abusado sa ilang gahom.
Alang sa yanong magbubuhis, kadaogan kini alang kanila, labi na niadtong nahikawan sa insaktong panirbesyo sa gobiyerno.
Leksiyon tuod kini sa mga public official, apan pila kaha ka mga opsiyal karon ang nagpahimus gihapon sa ilang gahom, pagwaldas sa kwarta sa katawhan apan wa gyud mapasakai og sumbong.
Politically motivated o dili, kining kaso sama niini angay gyud nga seryosohon sa gobiyerno aron malimpiyohan ang City Hall, Kapitolyo,ug uban pang buhatan sa gobiyerno gikan niining mga “kurakot” nga opisyal.
Unta daghan pang Elipe nga mabulgar ug mapalgan, ug mag-atubang sa kaso.