KIDAPAWAN CITY -- Mahiapil ang 39 ka barangay sa North Cotabato sa plebesito alang sa mugnaon nga Bangsamoro Autonomous Region in Muslim Mindanao (BARMM) nga hulip sa Autonomous Region in Muslim Mindanao (Armm).
Namugna ang BARMM pinaagi sa Bangsamoro Organic Law o Republic Act 11054.
Matud ni Abdullah “Dong” Cusain, pangulo sa Media Affairs Committee for the Bangsamoro Basic Law nga ang nahiapil nga mga barangay nag-“yes” sa 2001 nga plebesito.
Ang mga barangay nagagikan sa mga lungsod sa Pigcawayan, Midsayap, Aleosan, Pikit, Carmen ug Kabacan.
Kahinumdoman nga ang Armm gipalapad pinaagi sa Republic Act 9054 aron i-uban ang mga dapit nga uyon nga sila mahiapil sa Autonomous Region.
Niadtong Agosto 14, 2001 gipahigayon ang plebesito sa 39 ka mga nahisgutang barangay.
Miuyon sila nga mahiapil sa gipalapdan nga Armm apan wala mapatuman gumikan dili igo ang ihap sa mga miboto.
Subling balikan ang maong mga barangay sa probinsiya nga plebesito sa bulan sa Nobyembre alang sa bag-ong mugnaon nga BARMM kung uyon ba sila nga mahiapil sa Bangsamoro Region. (Edgar E. Fuerzas)