USA ka pulis kinsa maoy gituohang responsable sa sunod-sunod nga pagpanulis sa may Brgy. Tipolo, Mandaue City sukad niadtong Pebrero hangtod sa milabayng buwan ang nasikop sa Mandaue City Police Office (MCPO) kagahapon sa kadlawon.
Ang suspek giila nga si PO1 Argel Abella Fuentes, 31, minyo, taga Brgy. San Nicolas Proper, Cebu City.
Si Fuentes aktibong nagserbisyo sa Station 2 sa Cebu City Police Station.
Matod sa hepe sa Subangdaku Police Station 2 nga si P/SInsp. Rio Uy Ipong nga adunay nitaho sa iyang buhatan nga adunay lalakeng nagmotor nga nagtuyoktuyok sa may P. Basubas, Brgy. Tipolo mga alas 2 sa kadlawon.
Sigun ni Ipong nga ang paghulagway sa lalaki sama sa mga gipanghulagway sa mga nabiktima sa tulis sa dapit niadto hinungdan nga daling nimando si Ipong sa iyang mga sakop sa pagpatrolya sa area.
Apan sa pag-abot sa operatiba sa dapit, nakabantay na si Fuentes sa kapulisan ug bisan nga gigamitan kinig megaphone aron mohunong, nipasutoy gihapon kini og dagan.
Didto na na-corner sa mga kapulisan si Fuentes sa may dan Hernan Cortes duol sa usa ka furniture store human kini giatngan sa laing mobile patrol sa kapulisan.
Sumala ni Ipong nga nihana pa ang pulis og bunlot sa iyang armas sa iyang pagka-corner.
“Niaksyon siya og bunot sa armas, giingnan sa among nag-megaphone nga ‘Ayaw lang gyud intawon kay mga pulis ni,’” saysay ni Ipong.
Modus
“Way taptap, helmet ra maong maklaro ang iyang nawong. Moti-on siyag armas igtulis. Either gasoline station or cellphone,” sigun ni Ipong.
Base sa crime mapping sa Station 2 nga sukad Pebrero, mga pito na ang nabiktima ni Fuentes diin sagad iyang mga nabiktima nakuhaan og cellphone.
Nasuta ning mantalaan nga sagad tulison ni Fuentes kadtong may cellphone ug ang oras sa pagpangatake kadlawon.
Gigamit pa sa iyang dautang binuhatan ang iyang service firearm.
Halos sinemana sab ang iyang pag-atake. Gani, sigun ni Ipong nga adunay usa ka higayon nga singko minutos lang ang gintang sa iyang pagpangatake sa dakbayan.
Niadtong Hunyo 24, nakuhaan siyag CCTV video nga nanulis sa usa ka gasolinahan sa may MC Briones, Brgy. Tipolo sa dakbayan diin positibo siyang giila sa cashier nga maoy nitulis niya .
“Gihatag nako ang kwarta kay gitiunan man ko niya. Nailhan nako siya sa nawong. Nag-helmet siya (atol sa insidente) pero nakit-an nako siya kay way tabon sa nawong,’ butyag ni Jimmy Boy Etang, 27, cashier sa gasolinahan nga gitulis ni Fuentes.
Gitulis ni Fuentes gikan ni Etang niadtong Hunyo 24 sa kadlawon ang P1,500 nga halin sa gasolinahan ug service cellphone nga tag P7,000.
Katapusang niatake ang suspek niadtong Hulyo 10.
Kagahapon, upat na ka mga biktima lakip ni Etang ang nipatim-aw sa Subangdaku Police Station og positibong niila ni Fuentes nga maoy nitulis kanila.
Ang mga reklamante niluwat na sa ilang mga affidavit sa mga sirkumstansya sa pagtulis kanila.
Kagahapon na sa buntag na nga nahibaw-an sa kapulisan si Fuentes nga usa diay kini ka pulis human kini nagpaila kanila sanglit wa may ID nga nakuha ang kapulisan sa iyang pagkasikop.
Paambit ni Ipong nga sagad mga paghulagway sa mga nabiktima sa dapit mao nga ang suspek nagsul-ob og puwa nga helmet ug nagmotor og itom nga may yellow nga kolor.
Kini nitukma sa motor ug helmet nga gigamit sa suspek sa iyang pagkasikop.
Matod pa ni Ipong nga daw suweto si Fuentes sa Mandaue tungod kay nadestino man kini niadto sa Talamban.
Nakigkoordinar na sab si Ipong sa taga Casuntingan Police Station tungod kay gituohang si Fuentes sab ang luyo sa sunod-sunod nga tulis ug hold-up sa dapit.
Sa dihang gikuhaan og habig, kusganong gihimakak gihapon sa suspek ang mga pasangil niya.
Taktakon sa serbisyo
Gitataw sa hepe sa MCPO nga si P/SSupt. Julian Entoma nga angayan nga taktakon sa serbisyo si Fuentes tungod kay nagpaka-uwaw lang kini sa imahe sa kapulisan.
Apan pasakaan una kini og kasong driving without license ug disobedience tungod sa pagsupak sa kapulisan.